Քաղաքականություն
21.05.2024 | 18:09
Ադրբեջանի իշխանություններն ընդդիմադիր քաղաքական գործիչ, տնտեսագետ Գուբադ Իբադօղլուի գործով հետաքննության ժամկետը երկարացրել են մինչև օգոստոսի 20-ը՝ չնայած միջազգային ճնշումներին։ Այս մասին հայտնում է նրա եղբայրը՝ Գալիբ Թողրուլը, գրում են ադրբեջանական լրատվամիջոցները։
Նա նշել է, որ օրենքի համաձայն՝ Իբադօղլուին առաջադրված մեղադրանքի հոդվածներով հետաքննության առավելագույն ժամկետը կարող է լինել 12 ամիսը և կարող է երկարաձգվել միայն մեկ ամսով՝ գլխավոր դատախազի առաջարկով։ Միաժամանակ, ապրիլի 22-ին կայացված տնային կալանքի որոշումը փոխվել է ոստիկանության հսկողությամբ։ Սրա հետ կապված Իբադօղլուի ձեռքից հանվել է էլեկտրոնային թևնոցը, ինչը նրան թույլ կտա անցնել հետազոտություններ՝ համակարգչային տոմոգրաֆիա և մագնիսական ռեզոնանսային տոմոգրաֆիա։
Նշենք, որ օրերս հայտնի էր դարձել, որ Իբադօղլուի գլխավորած «Ադրբեջանի ժողովրդավարություն և բարգավաճում շարժում» կուսակցությունը դադարեցրել է գործունեությունը, ինքը՝ գործիչը, նույնպես դադարեցնում է քաղաքական գործունեությունը՝ առողջական խնդիրներով պայմանավորված։
Ապրիլի 22-ին Ադրբեջանի իշխանությունները, տեղի տալով միջազգային ճնշումներին, Իբադօղլուի բանտարկությունը փոխարինել էին տնային կալանքով։ Այնուհետև նրա հետ էր հանդիպել Բաքվում ԱՄՆ դեսպան Մարկ Լիբբին։ Գուբադ Իբադօղլուն կալանավորվել է 2023 թվականի հուլիսի 23-ին՝ կեղծ փողեր պատրաստելու (Քրեական օրենսգրքի 204.3.1 հոդված) և կրոնական ծայրահեղական բնույթի նյութեր տարածելու մեղադրանքով (քրեական օրենսգրքի 167-3.1 հոդված)։ Այս մեղադրանքներով նրան սպառնում է մինչև 17 տարվա ազատազրկում։ 2023 թվականի հուլիսի 24-ին Բաքվի Նարիմանովի շրջանային դատարանն ընդդիմադիր գործչի նկատմամբ խափանման միջոց է ընտրել 3 ամիս 26 օր ժամկետով կալանքը։ Փետրվարի 15-ին նրա կալանքը երկարացվել է ևս երեք ամսով։ Իբադօղլուն չի ընդունում առաջադրված մեղադրանքները՝ նշելով, որ իրեն բանտարկել են քաղաքական պատվերով։
Տեղական և միջազգային իրավապաշտպան կազմակերպությունները նրան համարում են քաղբանտարկյալ։ ԱՄՆ Պետքարտուղարությունն ու ԵՄ-ն էլ բազմիցս կոչ են արել ազատ արձակել ընդդիմադիր գործչին։
Էմմա Չոբանյան
