Քաղաքականություն
21.05.2024 | 13:37
Ռուսաստանի քաղաքացիությունից զրկված անձանց կթույլատրվի երկրում մնալ 15-ից 90 օր՝ կախված իրավիճակից։ Դա բխում է ՆԳՆ-ի մշակած օրինագծից, գրում է «Իզվեստիան»։
Ըստ աղբյուրի՝ նախարարների կաբինետում նախագիծը հավանություն է ստացել օրենսդրական գործունեության կառավարական հանձնաժողովի կողմից։ Այժմ այն կփոխանցվի Պետդումայի քննարկմանը։
Փաստաթղթի համաձայն՝ Ռուսաստանից մեկնելու համար 90-օրյա ժամկետ կտրամադրվի նրանց, ում քաղաքացիությունը դադարեցվում է կամավոր հրաժարվելու դեպքում։ Միաժամանակ, նման մարդիկ կկարողանան պարզեցված ընթացակարգով դիմել կացության թույլտվության համար։
Եթե անձը քաղաքացիությունից զրկվում է կեղծ փաստաթղթեր ներկայացնելու կամ գիտակցաբար կեղծ տեղեկություններ փոխանցելու համար, ապա նրան կտրվի 15 օր՝ Ռուսաստանից հեռանալու համար։
Հանցագործություն կամ երկրի ազգային անվտանգությանը վտանգ ներկայացնող գործողությունների համար քաղաքացիությունից զրկվածների մնալը երկրում կհամարվի անցանկալի։ Ըստ այդմ՝ Ռուսաստանի տարածքում այդ անձանց գտնվելու ժամկետը կարող է որոշվել անհատապես։
ՌԴ օրենսդրության մեջ համապատասխան փոփոխություններ են պահանջվել այն բանից հետո, երբ 2023 թվականի հոկտեմբերին ուժի մեջ է մտել «Ռուսաստանի Դաշնության քաղաքացիության մասին» նորացված օրենքը, որով ներդրվել է ձեռք բերված քաղաքացիության դադարեցման ինստիտուտը։ Նոր օրենքը սահմանել է այն հանցագործությունների ցանկը, որոնց համար անձը կարող է զրկվել քաղաքացիությունից։
