15.12.2025 | 17:57
Հայաստանը իրավունք չունի վատ հարաբերություն ունենալ որևէ հարևանի ու որևէ գերտերության հետ. Սամվել Կարապետյան
ԱՄՆ-ն ու Գերմանիան քննադատել են Իսրայելի վարչապետին և ՊՆ ղեկավարին կալանավորելու օրդերի վերաբերյալ ՄՔԴ դատախազի պահանջը
Քաղաքականություն
21.05.2024 | 13:00
Գերմանիայի ԱԳՆ-ն քննադատել է Միջազգային քրեական դատարանի գլխավոր դատախազ Քարիմ Խանի դիմումը՝ Իսրայելի վարչապետի և ՊՆ ղեկավարի, ինչպես նաև ՀԱՄԱՍ շարժման առաջնորդների կալանավորման օրդեր տրամադրելու մասին, գրում է DW-ի ռուսական ծառայությունը։
«Մի կողմից՝ Իսրայելի վարչապետ Բենիամին Նեթանյահուի և երկրի պաշտպանության նախարար Յոավ Գալանտի, մյուս կողմից՝ ՀԱՄԱՍ-ի երեք առաջնորդների կալանավորման օրդերների միաժամանակյա պահանջը համարժեքության սխալ տպավորություն է ստեղծել»,- ասվում է Գերմանիայի ԱԳՆ հայտարարության մեջ։
Նշվում է, որ ՀԱՄԱՍ-ը «բարբարոսական ջարդ» է իրականացրել՝ 2023 թվականի հոկտեմբերի 7-ին հարձակվելով Իսրայելի վրա, իսկ իսրայելական կառավարությունն «իրավունք և պարտավորություն ունի պաշտպանելու իր ժողովրդին»։ Միաժամանակ, նշվում է, որ Գերմանիան հարգում է Հաագայի դատարանի անկախությունը։
ԱՄՆ պաշտոնյաներըն ավելի կոշտ քննադատությամբ են հանդես եկել Քարիմ Խանի պահանջի հետ կապված։
«Ինչ էլ ենթադրի դատախազը, Իսրայելի և ՀԱՄԱՍ-ի միջև համարժեքություն չկա: Մենք միշտ Իսրայելի կողքին կլինենք՝ հակազդելով նրա անվտանգության սպառնալիքներին»,- ասվում է նախագահ Ջո Բայդենի հայտարարության մեջ:
Ավելի վաղ էլ պետքարտուղար Էնթոնի Բլինքենը դատախազի պահանջն անվանել էր «ամոթալի», իսկ ԱՄՆ Կոնգրեսի անդամ Մայք Ջոնսոնը խոսել է ՄՔԴ-ի դեմ պատժամիջոցների կիրառման մասին, եթե հաստատվեն իսրայելցի պաշտոնյաների ձերբակալության օրդերները։
Իտալիայի ԱԳ նախարար Անտոնիո Տայանին էլ ասել է, որ «անընդունելի է» Իսրայելի ժողովրդավարական ճանապարհով ընտրված կառավարությունը նույնացնել «ահաբեկչական կազմակերպության հետ, որը հանդիսանում է այն ամենի պատճառը, ինչ հիմա տեղի է ունենում Մերձավոր Արևելքում»:
Ֆրանսիայի ԱԳՆ-ն, մինչդեռ, աջակցություն է հայտնել Հաագայի դատարանին, «նրա անկախությանը և բոլոր իրավիճակներում անպատժելիության դեմ պայքարին»։ Հայտարարությամբ Ֆրանսիան դատապարտել է ՀԱՄԱՍ-ի կողմից «հակասեմական ջարդը», որն ուղեկցվել է «կտտանքներով և սեռական բռնությամբ»։ Միևնույն ժամանակ, Փարիզն Իսրայելին զգուշացրել է «միջազգային մարդասիրական իրավունքի խստիվ պահպանման անհրաժեշտության և Գազայի հատվածում խաղաղ բնակչության շրջանում զոհերի անընդունելի մակարդակի մասին»։
Հիշեցնենք, որ Միջազգային քրեական դատարանի գլխավոր դատախազ Քարիմ Խանը պահանջել է օրդերներ տալ՝ կալանավորելու Իսրայելի վարչապետ Բենիամին Նեթանյահուին, պաշտպանության նախարար Յոավ Գալանտին և իսլամիստական ՀԱՄԱՍ շարժման երեք առաջնորդների՝ Յահյա Սինվարին, Մուհամմադ Ալ-Մասրիին և Իսմայիլ Հանիեին:
