09.09.2026 | 20:47
Ծովինար Վարդանյանը հրաժարվել է ինձ ընդունել, դիմել եմ դատարան. Էդգար Ղազարյան. ՏԵՍԱՆՅՈՒԹ
ՆԱՏՕ-ի անդամ երկրներն Ուկրաինայում սկսել են երկրի ԶՈւ զինծառայողների վերապատրաստումը
Քաղաքականություն
20.05.2024 | 16:55
Հյուսիսատլանտյան դաշինքի որոշ երկրներ սկսել են երկրում ուկրաինացի զինվորականների վերապատրաստումը: Financial Times-ին տված հարցազրույցում այս մասին ասել է Էստոնիայի վարչապետ Կայա Կալլասը։
«Կան երկրներ, որոնք արդեն մարտադաշտում պատրաստում են ուկրաինացի զինվորներին»,- ասել է նա:
Կալլասը նշել է, որ այս պետությունները դա անում են՝ վտանգելով իրենք իրենց, և եթե ռուսական արկը դիպչի հրահանգիչներին, դա չի նշանակի ՆԱՏՕ-ի 5-րդ հոդվածի կիրառում, որը նախատեսում է հավաքական պատասխան՝ դաշինքի անդամ երկրի վրա հարձակման դեպքում:
«Ես չեմ կարող պատկերացնել, որ եթե ինչ-որ մեկը տուժի, ապա նրանք, ովքեր իրենց զորքերն ուղարկել են, կասեն՝ «Դա 5-րդ հոդվածն է, եկեք հարվածենք Ռուսաստանին»։ Դա այդպես չի գործում, ոչ ավտոմատ կերպով։ Նման մտավախություններն արդարացված չեն, եթե դուք ձեր մարդկանց ուղարկեք Ուկրաինային օգնության։ Դուք գիտեք, որ երկրում պատերազմ է ընթանում, և դուք հայտնվում եք ռիսկի գոտում»,- հավելել է նա։
Կալլասն ընդգծել է՝ որպեսզի Էստոնիան սկսի ուկրաինացի զինվորների ուսուցումը, Տալլինը պետք է ստանա խորհրդարանի հաստատումը։
«Դրանք բաց հրապարակային դեբատներ են, սակայն ես կարծում եմ, որ այժմ մենք չպետք է ոչինչ բացառենք»,- հայտարարել է վարչապետը։
