30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԱՄՆ-ը նոր պատժամիջոցներ է սահմանել ՌԴ-ից զենք վաճառողներ Ռաֆայել Ղազարյանի, Աշոտ Մկրտիչևի, Ալեքսեյ Բուդնևի դեմ
Քաղաքականություն
17.05.2024 | 15:03
ԱՄՆ Ֆինանսների նախարարության արտաքին ակտիվների վերահսկման գրասենյակը (OFAC) պատժամիջոցներ է սահմանել Ռուսաստանի երկու քաղաքացիների և երեք ռուսական կազմակերպությունների նկատմամբ՝ Հյուսիսային Կորեայից Ռուսաստան զենքի վաճառքը դյուրացնելու համար, հայտնում է VOA-ն։
«Այս գործողությունը նպաստում է ԱՄՆ կառավարության նպատակներին՝ արգելելու և բացահայտելու ԿԺԴՀ-ից Ռուսաստան զենքի փոխանցումը և հիմնված է ԱՄՆ Ֆինանսների նախարարության և Պետքարտուղարության կողմից սահմանված պատժամիջոցների վրա՝ ԿԺԴՀ-ի և Ռուսաստանի միջև սպառազինությունների փոխանցման, ներառյալ՝ ԿԺԴՀ-ում արտադրված զենքի, մասնավորապես՝ Ռուսաստանի կողմից Ուկրաինայի դեմ բալիստիկ հրթիռների փոխանցման և փորձարկման հետ կապված»,- ասված է գերատեսչության հայտարարության մեջ։
Ռուսաստանը և Հյուսիսային Կորեան իսկապես ուժեղացրել են իրենց ռազմական համագործակցությունը վերջին մեկ տարվա ընթացքում, երբ ԿԺԴՀ-ն Ռուսաստանին բալիստիկ հրթիռներ և զինամթերք է մատակարարել՝ ռազմական տեխնոլոգիաների դիմաց:
«Այսօրվա գործողություններն արտացոլում են Ռուսաստանի հետ Հյուսիսային Կորեայի խորացող ռազմական համագործակցությունը խափանելու մեր հանձնառությունը։ Միացյալ Նահանգները կշարունակի միջոցներ ձեռնարկել՝ պատասխանատվության ենթարկելու նրանց, ովքեր ձգտում են նպաստել զենքի և այլ նյութերի մատակարարմանը, որոնք Ռուսաստանին հնարավորություն կտան պատերազմ սկսել»,- ասել է ֆինանսների փոխնախարար Բրայան Նելսոնը:
2023 թվականի մարտին OFAC-ը Աշոտ Մկրտիչևին ներառել է Ռուսաստանի և Հյուսիսային Կորեայի միջև զենքի գործարքներին նպաստելու անձանց ցուցակում։ Նույն թվականի օգոստոսին OFAC-ը ցուցակում ներառել է ևս երեք ընկերություն, ներառյալ՝ «Վերուս» ՍՊԸ-ն՝ ռուսական ընկերություն, որը կապված էր Մկրտիչևի ցանցի հետ, որը նա օգտագործում էր պատժամիջոցներից խուսափելու համար: 2023 թվականի ընթացքում «Վերուս» ՍՊԸ-ի տնօրեն Ռաֆայել Ղազարյանը Մկրտիչևի հետ աշխատել է ԿԺԴՀ-ի և Ռուսաստանի հետ զենքի գործարքների ուղղությամբ։
Մասնավորապես, 2023 թվականի հոկտեմբերին Ղազարյանը Մկրտիչևի հետ համակարգել է ականանետեր և զինամթերք մատակարարելու առևտրային առաջարկները։ Ղազարյանն օգտագործել է նաև ռուսական «Տրանս Կապիտալ» ընկերությունը՝ հյուսիսկորեական զենքի վաճառողին ինքնաթիռի բաղադրիչների մատակարարումն ու առաքումը հեշտացնելու համար։ Բացի այդ, Ղազարյանը ռուսական «Ռաֆորտ» ՍՊՍԸ-ի սեփականատերն է։
2023 թվականի մարտին Ալեքսեյ Բուդնևը հեշտացրել է ռազմական կապի սարքավորումների մատակարարումը Ռուսաստան, որն արտադրվել է Հյուսիսային Կորեայում և նախատեսված է Ռուսաստանի զինված ուժերի համար։ Բուդնևը ռուսական «Տեխնոլոգիա» ՍՊԸ-ի միակ սեփականատերն է:
Ռաֆայել Ղազարյանը, Աշոտ Մկրտիչևը, Ալեքսեյ Բուդնևը և վերը թվարկված ընկերությունները ենթարկվում են պատժամիջոցների՝ Հյուսիսային Կորեա զենքի կամ հարակից նյութերի ուղղակի կամ անուղղակի ներմուծման, արտահանման կամ վերաարտահանման համար։
