11.08.2026 | 20:19
Միայն 4 օրում պարեկները վարորդների կողմից բեռների փոխադրման կանոնների խախտման 90 դեպք են արձանագրել
Բաքվի իշխանությունները կրկին հրաժարվել են արտոնել ընդդիմության հանրահավաքը
Քաղաքականություն
15.05.2024 | 22:13
Բաքվի գործադիր իշխանությունը կրկին մերժել է ընդդիմադիր ուժերին միավորող Ժողովրդավարական ուժերի ազգային խորհրդի դիմումը՝ մայիսի 19-ին հանրահավաք անցկացնելու վերաբերյալ։ Քաղաքային իշխանություններն անընդունելի են համարել ընդդիմության առաջարկած հանդիպման վայրերը։ Նշվել է, որ Յասամալ թաղամասի մարզադաշտը «վերանորոգման փուլում է», իսկ «Մայիսի 28» և «Նարիմանով» մետրոյի կայարանների դիմաց գտնվող տարածքները ուղևորների և տրանսպորտային միջոցների ինտենսիվ հոսքի վայրեր են։
Ժողովրդական ճակատ կուսակցության փոխնախագահ Սեյմուր Հազին ասել է, որ Բաքվի գործադիր իշխանության որոշումը Սահմանադրության և հավաքների ազատության կոպիտ խախտում է։
Ավելի վաղ Բաքվի գործադիր իշխանությունը երկու անգամ մերժել էր արտոնել նախ՝ ապրիլի 21-ին, ապա՝ մայիսի 5-ին նշանակված հանրահավաքները։ Ընդդիմությունը ցանկանում է հանրահավաքն անցկացնել քաղբանտարկյալների ազատ արձակման, ընտրական բարեփոխումների, Ադրբեջանի և ԵՄ-ի միջև նոր համաձայնագրի ստորագրման, ցամաքային սահմանների բացման, աշխատավարձերի, կենսաթոշակների բարձրացման և այլ պահանջներով։
Նշենք, որ վերջերս էլ Ադրբեջանի ընդդիմադիր «Ժողովրդական ճակատ» կուսակցության նախագահ Ալի Քերիմլին հանդիպել էր Բաքվում ԵՄ պատվիրակության ղեկավար, դեսպան Պետր Միխալկոյին։ Կողմերը քննարկել էին երկրում մարդու իրավունքների իրավիճակին, ինչպես նաև հավաքների ազատությանը վերաբերող հարցեր։
Էմմա Չոբանյան
