Եկեղեցու հերն եք անիծում ՌԴ-ի պարտադրանքն իրագործելով․ շարժումը մաշվելու է, պոտենցիալ չունի ցնցելու ժողովրդի կյանքը․ Հայկ Սուքիասյան․ ՏԵՍԱՆՅՈՒԹ

ԱԳՆ նախկին գլխավոր քարտուղար Վահագն Մելիքյանը երեկվա հանրահավաքի ժամանակ ներկայացրեց նախկին դիվանագետների մշակած փաստաթուղթը՝ նախ նշելով, որ Ալմա-Աթայի հռչակագիրը սահմանազատման հիմք ընդունելը «հակաիրավական է և քրեորեն պատժելի»։ Առաջարկվում է դադարեցնել սահմանազատումն ու սահմանագծումը, որի հիմքում դրված է Ալմա-Աթայի հռչակագիրը․ «Ալմա-Աթայի հռչակագիրը որևէ կերպ չի կարող նման հիմք հանդիսանալ, քանի որ չի պարունակում սահմանային որևէ նկարագիր։ Հռչակագիրը ենթադրում է միմյանց նկատմամբ տարածքային հավակնություններ չներկայացնելու պահանջը»,- նշել էր Մելիքյանը։

Քրիստոնեա-ժողովրդավարական կուսակցության փոխնախագահ, քաղաքագետ Հայկ Սուքիասյանը Factor TV-ի հետ  զրույցում պնդում է, որ Երևանի փողոցներում սահմանազատման պրոցեսի դեմ հանրահավաքներն ու բողոքի ակցիաները ավելի շատ նպատակ ունեն խանգարել «ռուս-թուրքական» ծիրից դուրս գալու ՀՀ-ի ձգտումներին, քան սահմանազատման խնդրահարույց հարցերն են բարձրացնում․ «Ինչո՞վ է այս սահմանազատումը հող հանձնել կամ դավաճանություն։ Երկու կայսրություն եկել են մի պետության դեմ են գործում, Ադրբեջանին հեծնել են, քշում են ՀՀ-ի վրա, ինչ ասես՝ կարողացել են տանել։ Հիմա այս պետությունը վերքոտ վիճակում հասել է սահմանազատման պրոցեսի։ Հարցը գիտե՞ք որն է, իրենք հաշվել են, որ եթե սահմանազատումը եղավ, Հայաստանը պոկվելու է։ Եթե եղավ սահմանազատումը, մենք ռուս-թուրքական գործարքը ճեղքելու ենք։ Հիմա հասկանալով դա՝ այս մարդկանց փողոցներ են հանել՝ թույլ չտալու, որ դա տեղի ունենա։ Կեղծ թեզեր են առաջ քաշում, որ սահմանազատումը պետք է արվի՝ հրադադարի գծով կամ այն սկզբունքով, թե որտեղ հայ զինվորը կանգնած է՝ դա է սահմանը»։ Հայկ Սուքիասյանը նշում է, որ այսպիսի ձևակերպումները դեմ են միջազգային իրավունքի սկզբունքներին, և դրանք պետության կողմից իրագործելու դեպքում պատժամիջոցներ կարող են լինել ՀՀ-ի դեմ։

Հարցազրույցն ամբողջությամբ՝ տեսանյութում։

Ռոբերտ Անանյան