ԵԽ-ն Թուրքիային կոչ է անում ազատ արձակել կալանավորված լրագրողներին

Եվրոպայի խորհուրդը Թուրքիայի կառավարությանը կոչ է արել ազատ արձակել անցած շաբաթ կալանավորված լրագրողներին և չեղարկել լրատվամիջոցների այլ աշխատակիցների նկատմամբ կիրառված դատական ​​վերահսկողության միջոցները, գրում է Stockholm center for freedom-ը։

ԵԽ Լրագրողների անվտանգության պլատֆորմը պաշտոնական պատասխան է խնդրել Թուրքիայի կառավարությունից մինչև հուլիսի 30-ը։

Այս կոչը հնչում է ապրիլին երեք լրագրողների կալանավորումից հետո, որոնք մեղադրվում են «ահաբեկչական կազմակերպությանն անդամակցելու մեջ»։ Թուրքական ոստիկանությունն ապրիլի 23-ին մի շարք համակարգված ռեյդեր էր իրականացրել Ստամբուլում, Անկարայում և հարավ-արևելյան Շանլըուրֆա նահանգում, ինչի արդյունքում 9 քուրդ լրագրող է ձերբակալվել։ Լրագրողները ոստիկանությունում պահվել են մինչև ապրիլի 26-ը, երբ վերջապես կարողացել են ցուցմունք տալ։

Ցուցմունքներից հետո Mezopotamya-ի քուրդ լրագրողներ Մեհմեդ Ասլանը և Էսրա Սոլին Դալը, ինչպես նաև մեկ այլ լրագրող՝ Էրդողան Ալայումաթը կալանավորվել են։

Մնացած վեց լրագրողները, որոնք աշխատում են տարբեր քրդական լրատվամիջոցներում, ազատ են արձակվել դատական ​​հսկողության ներքո, ինչը նշանակում է, որ նրանք պետք է պարբերաբար ստուգվեն ոստիկանական բաժանմունքում և նույնպես ենթակա են ճանապարհորդության արգելքի:

Լրագրողների պաշտպանության կոմիտեն (CPJ) նույնպես հայտարարություն է տարածել՝ դատապարտելով ձերբակալությունները և կոչ անելով դադարեցնել քուրդ լրագրողների նկատմամբ պարբերական ոտնձգությունները։

«Թուրքիայի իշխանությունները շարունակում են հետապնդել ԶԼՄ-ների ներկայացուցիչներին և հետևողականորեն չեն կարողանում հավաստի ապացույցներ տրամադրել նրանց դեմ ուղղված ահաբեկչության մեղադրանքները հիմնավորելու համար: Միակ պատճառը, որ դատարանները թաքցնում են իրենց հետաքննության վերաբերյալ իրենց գաղտնիության հրամաններով, որևէ օրինախախտման ապացույցների բացակայությունն է։ Հերթական անգամ քուրդ լրագրողներին ստիպում են օրեր անցկացնել բանտում, հարցաքննվել իրենց մասնագիտական ​​գործունեության հետ կապվածլ»,- ասել է Թուրքիայում CPJ-ի ներկայացուցիչ Օզգուր Օգրեթը։

Նա նշել է, որ Թուրքիայի իշխանությունները պետք է անհապաղ ազատ արձակեն լրագրողներին, չեղարկեն դատական ​​հսկողության միջոցները, դադարեցնեն ոտնձգությունները, որոնք միայն արատավորում են երկրի համաշխարհային հեղինակությունը մամուլի ազատության առումով։

Էմմա Չոբանյան