24.05.2026 | 15:29
Տեղամասային կենտրոնի փոփոխություն՝ օնլայն դիմումով․ ԿԸՀ-ի պարզաբանումը
Զելենսկիի հետ զրույցից հետո Թրամփը Մոսկվային ու Կիևին 30-օրյա հրադադարի կոչ է արել՝ այն չհարգելու դեպքում սպառնալով պատժամիջոցներով
Քաղաքականություն
09.05.2025 | 11:07
ԱՄՆ նախագահ Դոնալդ Թրամփը Կիևին և Մոսկվային կոչ է արել համաձայնվել 30-օրյա անվերապահ հրադադարին և հայտարարել, որ եթե այն չպահպանվի, պատժամիջոցներ կկիրառի։ Այս մասին նա գրել է իր Truth Social սոցիալական ցանցում Ուկրաինայի նախագահ Վլադիմիր Զելենկսիի հետ հեռախոսազրույցից հետո։
«Ռուսաստանի/Ուկրաինայի հետ բանակցությունները շարունակվում են։ ԱՄՆ-ը 30-օրյա անվերապահ հրադադարի կոչ է անում։ Հուսով ենք, որ կպահպանվի ընդունելի հրադադար, և երկու երկրներն էլ պատասխանատու կլինեն այս ուղիղ բանակցությունների սրբությունը հարգելու համար։ Եթե հրադադարը չհարգվի, ԱՄՆ-ը և նրա գործընկերները կկիրառեն լրացուցիչ պատժամիջոցներ։ Որպես նախագահ՝ ես հավատարիմ կմնամ Ռուսաստանի և Ուկրաինայի միջև խաղաղության ապահովմանը՝ եվրոպացիների հետ միասին, և դա կլինի երկարատև խաղաղություն։ Այս հրադադարը, ի վերջո, պետք է վերածվի խաղաղության համաձայնագրի։ Ամեն ինչ կարող է արվել շատ արագ, և ես հասանելի կլինեմ ցանկացած պահի, եթե իմ ծառայությունները անհրաժեշտ լինեն»,- գրել է ԱՄՆ նախագահը։
Ուկրաինայի նախագահ Վլադիմիր Զելենսկին էլ հայտնել է, որ Թրամփի հետ զրույցի ընթացքում քննարկել են այն փաստը, որ Գերագույն ռադան վավերացրել է Միացյալ Նահանգների հետ օգտակար հանածոների վերաբերյալ համաձայնագիրը, ինչպես նաև «խաղաղության համար հետագա ջանքերի անհրաժեշտությունը»։ Զրույցի ընթացքում Զելենսկին նշել է, որ Ուկրաինան պատրաստ է համաձայնել 30-օրյա հրադադարի «նույնիսկ այսօրվանից» և ակնկալում է, որ Ռուսաստանը կհամաձայնվի այդ առաջարկին։
«Ես նաև հաստատեցի, որ Ուկրաինան պատրաստ է բանակցությունների ցանկացած ձևաչափով։ Սակայն դրա համար Ռուսաստանը պետք է ցույց տա պատերազմը դադարեցնելու իր մտադրությունների լրջությունը՝ սկսելով լիակատար և անվերապահ հրադադարից։ Նախագահ Թրամփը հաստատել է, որ ցանկանում է, որ այս պատերազմն ավարտվի, պատրաստ է օգնել և աջակցում է հրադադարի անհրաժեշտությանը»,- նշել է Զելենսկին։
Հիշեցնենք, որ ապրիլի վերջին Ռուսաստանի նախագահ Վլադիմիր Պուտինը հայտարարել էր եռօրյա հրադադարի մասին՝ կապված Երկրորդ համաշխարհային պատերազմում տարած հաղթանակի 80-ամյակի տոնակատարությունների հետ։ Հրադադարն ուժի մեջ է երեք օր՝ մայիսի 8-ի Մոսկվայի ժամանակով 00:00-ից մինչև մայիսի 11-ը ժամը 00:00-ն։
Ուկրաինայի նախագահ Վլադիմիր Զելենսկին էլ հստակեցրել էր՝ Կիևը չի ընդունում կարճաժամկետ հրադադարը և առաջարկում է հրադադար առնվազն 30 օրով։
Թարգմանությունը՝ Էմմա Չոբանյանի
