04.10.2026 | 22:31
Եղիշե Մելիքյանը և Իգոչուկվու Իվուն՝ Չեռնոգորիայի հավաքականի դեմ խաղի մասին. ՏԵՍԱՆՅՈՒԹ
ՀՀ-ն մամուլի ազատության ինդեքսում առաջադիմել է 6 տեղով․ ցուցանիշի բարելավում՝ ճնշումների և բռնության ֆոնին․ ՏԵՍԱՆՅՈՒԹ
Քաղաքականություն
03.05.2024 | 21:15
Հայաստանը Մամուլի ազատության համաշխարհային ինդեքսում 6 միավորով բարելավել է իր ցուցանիշը՝ նախորդ տարվա 49-րդ հորիզոնականի փոխարեն զբաղեցնելով 43-րդ տեղը։ «Լրագրողներ առանց սահմանների» կազմակերպությունը հրապարակած զեկույցում, այդուհանդերձ, արձանագրում է․ չնայած բազմակարծության միջավայրին՝ հայաստանյան լրատվամիջոցները շարունակում են բևեռացված մնալ:
Երևանի մամուլի ակումբի պատվավոր նախագահ Բորիս Նավասարդյանը նկատում է՝ խոսքի ազատությունն ամրապնդելու նպատակով պետք է հաղթահարել լրատվամիջոցների բևեռացումը։
«Լրագրողներ առանց սահմանների» կազմակերպությունը երկրորդ տարին անընդմեջ շեշտում է, որ հայաստանյան լրատվամիջոցների բևեռացումն արտացոլում է քաղաքական դաշտի բևեռացումը՝ բազմաթիվ լրատվամիջոցներ մոտ են իշխանություններին, իսկ մյուսները հավատարիմ են մնում նախկին օլիգարխներին։ Զեկույցում նշվում է, որ Civilnet.am-ը, hetq.am-ը, Factor.am-ը, Azatutyun.am-ը կատարում են անկախ հսկչի՝ watchdog-ի դերը, որն էական նշանակություն ունի ժողովրդավարության համար: Զեկույցի համաձայն՝ պետական լրատվամիջոցները ձեռնպահ են մնում կառավարության հասցեին որևէ քննադատությունից։
Ըստ Բորիս Նավասարդյանի՝ Հայաստանում խոսքի ազատությունը և լրագրողների ու լրատվամիջոցների պաշտպանվածությունը շատ տարերային իրավիճակում են։
«Լրագրողներ առանց սահմանների» կազմակերպությունը զեկույցում նշում է, որ Հայաստանում լրագրողները հաճախ են ենթարկվում բռնությունների, ճնշումների թե՛ իշխանության, թե՛ ընդդիմության կողմից՝ խորհրդարանում, փողոցում և սոցիալական ցանցերում։
Մեդիա նախաձեռնությունների կենտրոնի գործադիր տնօրեն Նունե Սարգսյանը լրատվամիջոցների և լրագրողների աշխատանքում պետության միջամտությունը նվազեցնելու և ինքնակարգավորման մեխանիզմներն ու նախաձեռնությունները բարձրացնելու շուրջ այսօր հրավիրված քննարկման ընթացքում անդրադարձավ վերջին օրերին լրագրողների նկատմամբ բռնությանը։
Դատապարտելի է լրագրողների մասնագիտական պարտականությունների կատարման խոչընդոտումը՝ անկախ նրանից, թե ինչ որակի արտադրանք են տալիս նրանք՝ ասում է Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը։ Լրագրողների նկատմամբ բռնության նոր դեպքեր տեղի ունեցան վերջին մեկ շաբաթում։ Տավուշում ակցիա լուսաբանող օպերատորին ոստիկանները գետնին էին տապալել, նույն օր ակցիա լուսաբանող լրագրող էր բռնության ենթարկվել Լոռու մարզում, մի քանի օր անց էլ ընդդիմադիր պատգամավորի օգնականը հարվածել էր իշխանական մեդիայի լրագրողին։
Չնայած խնդիրներին՝ Հայաստանը, այդուհանդերձ, մամուլի ազատության ցուցանիշով տարածաշրջանում բացարձակ առաջատարն է մնում։ Վրաստանն անցյալ տարվա համեմատ կտրուկ՝ 26 միավորով նահանջել է՝ նախորդ տարվա 77-րդ հորիզոնականից իջնելով 103-րդ հորիզոնական։ «Լրագրողներ առանց սահմանների» կազմակերպությունը զեկույցում արձանագրում է՝ Մոսկվայի հետ կապերը սերտացնող Վրաստանի իշխող ուժը թշնամական քաղաքականություն է վարում մամուլի նկատմամբ։
Տարածաշրջանի մյուս երկրների պարագայում պատկերն այսպիսին է․ Իրանը 179-րդ տեղն է զբաղեցնում, Ադրբեջանը՝ 164-րդը, Թուրքիան՝ 158-րդը, իսկ Ռուսաստանը 162-րդ։
Մանրամասները՝ տեսանյութում։
Անի Թամրազյան
