15.09.2026 | 09:33
ՀՀ տարածքում ավտոճանապարհներն անցանելի են
Ինչ է ասել Փաշինյանը կիրանցեցիներին. Գեղամ Նազարյանը մանրամասնում է. ՏԵՍԱՆՅՈՒԹ
Քաղաքականություն
29.04.2024 | 22:05
Ավարտվել է Կիրանցի բնակիչների և Նիկոլ Փաշինյանի հանդիպումը, որը շուրջ 2 ժամ է տևել։ Կիրանցի բնակիչները վրդովված էին, բնակիչներից մեկն արտասվում էր։ Նրանք հրաժարվեցին լրագրողների հարցերին պատասխանել։
Կիրանցեցիներից մեկն ասաց, որ ոչինչ չի փոխվել, ամեն ինչ նույնն է մնացել։
ԱԺ «Հայաստան» խմբակցության պատգամավոր Գեղամ Նազարյանը, որը կիրանցեցիների հետ հասցրել էր շփվել, հայտնեց, որ հանդիպմանը Նիկոլ Փաշինյանը ոչ մի կոնկրետ բան չի ասել, նրա պատասխաններն ավելի են խորացրել տավուշցիների մտահոգությունները։
«Ասել է՝ սահմանը կարող է էսպես անցնի, բայց կարող է նաև էնպես անցնի, նորից անորոշության, տագնապի մեջ է դրել բնակիչներին։ Մարդիկ արդեն մտածում են ամենավատի մասին։ Էն պահանջները, ողջամիտ առաջարկները, որոնք արվել են Կիրանցի բնակիչների կողմից, ոչ մեկը չի ընդունվել, գոնե վերջին տարբերակով, որ սահմանը ոնց որ խորհրդային տարիներին անցել է, այնպես անցնի։ Չի ընդունվել։ Նույնիսկ սահմանը կարող է գյուղի ամենամեջտեղով անցնի։
Փաշինյանի բառերն եմ ասում, ասել է՝ որ սահմանապահը կանգնի, դուք անվտանգ կլինեք, բայց կարող է՝ մի 7 օր անվտանգ ապրեք, 8-րդ օրն անվտանգ չլինի, ես ի՞նչ իմանամ։
Մարդիկ շոկի մեջ են, պիտի հասկանան՝ ինչ են անում։ Մեկն ասում է՝ տունս կվառեմ, մյուսն ասում է՝ մեկ այլ բան»,- փոխանցեց պատգամավորը։
Մանյա Պողոսյան
