11.08.2026 | 22:39
Ճապոնիայի Իբարակի նահանգում մոլեգնում է թայֆունը
Ավինյանի ելույթը «հաչալու» մասին ուսումնասիրում է ԿԿՀ-ն․ GRECO-ի 22 առաջարկության հետքերով․ ՏԵՍԱՆՅՈՒԹ
Քաղաքականություն
23.04.2024 | 21:37
Երևանի ավագանու վերջին նիստում հերթական լեզվակռվի ժամանակ քաղաքապետ Ավինյանի մի շարք արտահայտություններն ուսումնասիրում է Կոռուպցիայի կանխարգելման հանձնաժողովը։ Քաղաքապետին և մի շարք այլ բարձրաստիճան պաշտոնյաների առնչվող վարքագծի կանոնագիրքն ուժի մեջ է մտել ապրիլի 1-ից։
Պաշտոնյաների վարքագծի կանոնագիրքը մեկն է այն առաջարկություններից, որոնք Եվրոպայի խորհրդի Կոռուպցիայի դեմ պայքարող պետությունների խումբը՝ GRECO-ն, օրերս ներկայացրել է Հայաստանին։ Կոռուպցիայի կանխարգելման հանձնաժողովը, սակայն, արդեն իսկ մշակել է այն կանոնները, որոնք պետք է պահպանեն պաշտոնյաները։
GRECO-ի զեկույցում կոչ է արվում ՀՀ-ին բարձրագույն գործադիր մարմիններում ուժեղացնել վերահսկողությունը, շարունակել կոռուպցիան կանխելու ջանքերը, իսկ ոստիկանական համակարգում ընդունել հատուկ և գործառնական հակակոռուպցիոն գործողությունների ծրագիր։
«Զեկույցում ընդգրկված առանձին ոլորտների առնչությամբ հարուցվել են լայնածավալ քննություններ՝ քրեական պատասխանատվության ենթարկել ու նախկին ռեժիմների հետ կապված կոռուպցիոն և կլեպտոկրատական լուրջ ցանցերին: Կատարված այցերի պահին գործերն ընթացքի մեջ են եղել, և դատապարտման որևէ դեպք չի եղել։ Ոստիկանությունն արդեն երկար ժամանակ է, ինչ տուժում է ինստիտուցիոնալ թուլություններից, կոռուպցիայի մեջ մեղադրանքներից և ուժի կիրառումից։ 2018 թվականին իրավապահ մարմիններում բարձրաստիճան պաշտոնյաների զանգվածային պաշտոնանկությունից և 2019 թվականի դեկտեմբերին լայնածավալ բարեփոխումների մեկնարկից հետո վերջին տարիներին բարելավումներ են տեղի ունեցել, սակայն էթիկայի հստակ ենթակառուցվածքը դեռևս բացակայում է»,- նշվում է զեկույցում։
Կառույցն իր զեկույցում արձանագրել է՝ կոռուպցիոն հնչեղ դեպքերի և բարձրաստիճան նախկին պաշտոնյաների մասով ուժի մեջ մտած որևէ դատավճիռ չկա։
«Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանն այստեղ կապ է տեսնում, այսպես ասած, «նախկինների» հետ։ Այս մասին անդրադարձ է կատարվել նաև GRECO-ի զեկույցում։ Կառույցը ՀՀ-ին առաջարկում է առնվազն երկու տարի սահմանափակել նախկին պաշտոնյայի նշանակումը ղեկավար պաշտոնում այն ոլորտում, որը ժամանակին համակարգել է։
GRECO-ն առաջարկում է նաև վերանայել նախագահի, վարչապետի, վարչապետի թեկնածուի և Ազգային ժողովի նախագահի արարողակարգային ծախսերի հետ կապված պետական գնումների գործող փակ գործընթացները։
Ըստ էության՝ զեկույցում հստակ շեշտադրվում է, որ 2018 թվականի հեղափոխությունից հետո նախաձեռնված բարեփոխումների հավակնոտ ծրագիրը՝ կոռուպցիան արմատախիլ անելու, պետական կառավարումն արդիականացնելու, ստվերային տնտեսությունը նվազեցնելու, մենաշնորհների ու օլիգարխիկ կարտելների դեմ պայքարի մասով դեռևս էական արդյունքներ չի գրանցել։ Այս ամենը վերաբերում է նաև Ոստիկանությանը։
Եվրոպայի խորհրդի հակակոռուպցիոն մարմինը 18 ամիս ժամանակ է տվել Հայաստանին, որ ներկայացված 22 առաջարկություններն իրականացնելու ուղղությամբ ձեռնարկված քայլերի մասին հաշվետվություն ներկայացնի։ ՀՀ-ն մինչև 2025 թվականի սեպտեմբերի 30-ը ժամանակ ունի։
Մանրամասները՝ տեսանյութում։
Ռոզա Վարդանյան
