12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Կյանք փրկող որոշում է․ Զելենսկին՝ 61 մլրդ դոլարի օգնության մասին
Քաղաքականություն
21.04.2024 | 14:37
«Ուկրաինային օգնելու կենսական օրինագիծը, որն ընդունվել է ԱՄՆ Ներկայացուցիչների պալատի կողմից, կկանխի պատերազմի ընդլայնումը, կփրկի հազարավոր կյանքեր և կօգնի մեր երկու երկրներին էլ ավելի ուժեղանալ»,- այսպես է մեկնաբանել Ուկրաինայի նախագահ Վլադիմիր Զելենսկին Ներկայացուցիչների պալատի կողմից երեկ կայացված որոշումը։ Այս մասին գրում է Euronews-ը։
«Ամերիկյան աջակցության փաթեթը, որի համար մենք այդքան պայքարեցինք, շատ նշանակալի ֆինանսավորում է: Այդ օգնությունը կզգան թե՛ առաջնագծում կանգնած մեր զինվորները, թե՛ ռուսական տեռորից տուժած մեր քաղաքներն ու գյուղերը։ Շնորհակալ եմ բոլորին, ովքեր աջակցեցին օրինագծին, սա կյանք փրկող որոշում է»,- նշել է Զելենսկին։
Հսկայական փաթեթը նախատեսում է 61 մլրդ դոլարի օգնություն։ 14 միլիարդ դոլարը հատկացվելու է ուկրաինական բանակի վերապատրաստման և վերազինման համար:
Մոտ 10 մլրդ դոլարի օգնություն, որը կտրամադրվի վարկերի տեսքով, ուղղվելու է էներգետիկ ոլորտին և ենթակառուցվածքների վերականգնմանը։ Գաղափարն առաջարկել է Դոնալդ Թրամփը, ով կարծում է, որ Միացյալ Նահանգները պետք է «դադարի փող տալ՝ առանց այն հետ ակնկալելու»։
Բյուջեի մեծ մասն ուղղվելու է ամերիկյան զինանոցը համալրելուն ու ամերիկյան զենքի գործարաններին։ Երբ տեքստը հաստատվի Սենատում, որտեղ Ջո Բայդենի դաշնակիցները մեծամասնություն ունեն, և ստորագրվի նախագահի կողմից, ԱՄՆ-ին մեկ շաբաթից քիչ ժամանակ կպահանջվի զենքի մատակարարումը վերսկսելու համար: Այս մասին հայտնում է The Washington Post-ը՝ հղում անելով ԱՄՆ վարչակազմի մի քանի անդամների։
Սպիտակ տան խոսնակ Կարին Ժան-Պիերը ուրբաթ ասել է, որ ԱՄՆ-ի օգնության հոսքը Ուկրաինային կվերսկսվի «անհապաղ», երբ տեքստն ընդունվի Կոնգրեսի երկու պալատների կողմից:
