Մետրոյի Աջափնյակ կայարանը կարող է վտանգել Հրազդանի կիրճի հուշարձանները. ինչ է անելու քաղաքապետարանը. ՏԵՍԱՆՅՈՒԹ

Երևանի Աջափնյակ վարչական շրջանում մետրոյի կայարանի շինարարական նախագիծն անցնում է Հրազդանի կիրճով։ Ազգային, հնագիտական հարցերով խորհրդատու Բորիս Գասպարյանի դիտարկմամբ՝ մետրոյի կայարանի շինարարական նախագիծը պարունակում է պատմամշակութային ռեսուրսների վտանգման ռիսկեր։ Խոսքը վերաբերում է հատկապես Աջափնյակի քարանձավային համալիրի 4-րդ քարանձավին։

Աջափնյակի քարանձավային համալիրի 4 քարայրներն էլ ներառված են Երևան քաղաքի պատմության և մշակույթի անշարժ հուշարձանների ցանկում և պահպանվում են պետության կողմից։ Բորիս Գասպարյանի խոսքով՝ եթե մյուս 3 քարայրները մետրոյի կայարանի շինարարական նախագծի շրջանակում ենթարկվում են անուղղակի ազդեցության, ապա 4-րդ քարայրն ուղղակի ազդեցության գոտում է։

Factor TV-ն Երևանի քաղաքապետարանից հետաքրքրվեց՝ ի՞նչ քայլեր են ձեռնարկվում Աջափնյակում մետրոյի կայարանի շինարարական նախագծի շրջանակում Հրազդանի կիրճի պատմամշակութային հուշարձանները պահպանելու ուղղությամբ։ Քաղաքապետարանի աշխատակազմի լրատվության վարչությունից տեղեկացրին, որ Աջափնյակում մետրոյի կայարանի շինարարական նախագծով նախատեսվող տարածքում կան թվով 4 հնագիտական, հատուկ պահպանվող միավորներ․ 2-ը՝ ջրանցք, 2-ը՝ քարանձավ։ Այդ 4 միավորից 3-ը, քաղաքապետարանի հավաստմամբ, ընկնում են անվտանգ հեռավորության վրա, և միայն 1 քարանձավ է, որը շինարարական գոտուն մոտ է։

«Չորրորդ քարայրն ամբողջովին կպեղվի, կհանվեն պատմամշակութային բոլոր արժեքները, հետո ամրակայելու փորձ կկատարվի. սա է արժեքները փրկելու միակ ճանապարհը»,- ասում է Բորիս Գասպարյանը:

Երևանի քաղաքապետարանից նաև տեղեկացրին, որ դեռ պետք է անցկացվեն մասնագիտական քննարկումներ, որպեսզի տրվի եզրակացություն՝ այդ քարայրում մշակութային արժեքներ, որոնք ենթակա են պահպանման, կա՞ն, թե՞ ոչ։ Եթե պարզվի, որ կան, պետք է իրականացվեն քարայրի մշակութային արժեքների տեղափոխման աշխատանքներ, իսկ Աջափնյակում մետրոյի կայարանի շինարարական նախագծի, մասնավորապես, մետրոյի հետագծի փոփոխությունը, ըստ քաղաքապետարանի, բացառվում է։

Հնագետ Բորիս Գասպարյանը կայարանի կառուցման նախագիծը ռիսկային է համարում նաև Ք․Ա․ 8-րդ դարում կառուցված, պատմության և մշակույթի անշարժ հուշարձանների ցանկում ներառված Դալմայի ջրանցքի փոքր թունելի համար։ Նա շեշտում է՝ պետք է մշակվեն պահպանական հատուկ միջոցառումներ և չափումներն արվեն այնպես, որ ո՛չ շինարարության, ո՛չ շահագործման ժամանակ ցնցումները չվնասեն թունելը։

Մանրամասները`տեսանյութում:

Աննա Բաբաջանյան