Տավուշի մարզի Ոսկեպար բնակավայրի վարչական ղեկավար Իշխան Աղբալյանը Factor.am-ի հետ զրույցում հաստատեց շրջանառվող տեղեկությունը, որ վարչապետ Նիկոլ Փաշինյանն այսօր այցելու է իրենց գյուղ։ Նա այլ հարցերի չպատասխանեց՝ պատճառանալով, թե «խառն» է։
Տեղեկությունը փորձեցինք ճշտել նաև վարչապետի խոսնակ Նազելի Բաղդասարյանից։ Նա, սակայն, զանգերին չպատասխանեց:
Հիշեցնենք, որ Նիկոլ Փաշինյանը մարտի 18-ին էր այցելել Ոսկեպար։ Վարչապետը հանդիպում էր ունեցել Ոսկեպարի, Բաղանիսի և հարակից բնակավայրերի բնակիչների հետ։ Հանդիպմանը քննարկվել էր 4 գյուղերի հանձնման մասին ադրբեջանական կողմի պահանջը․ խոսքը Բաղանիս-Այրում, Աշաղը Ասքիպարա, Խեյրիմլի և Ղըզըլհաջիլի մասին է, որոնք այս պահին բնակեցված չեն։
Փաշինյանը տավուշցիներին ասել էր, որ եթե ՀՀ-ն այդ բնակավայրերը չվերադարձնի, պատերազմ է սկսվելու։ Նա հարակից բնակավայրերի բնակիչներին խոստացել էր, որ կրկին կհանդիպի նրանց հետ։
Մարտի 12-ին տեղի ունեցած ասուլիսում էլ Նիկոլ Փաշինյանը հայտարարել էր, որ այդ գյուղերը ՀՀ տարածքի մեջ չեն մտնում։
«Երբեք ոչ մի քննարկման ժամանակ խոսք չի եղել ու խոսք չի կարող լինել Տավուշի մարզի որևէ գյուղ հանձնելու մասին: Երբ ադրբեջանական մամուլում բարձրաձայնում են գյուղերի անուններ, ՀՀ տարածքում երբեք այդպիսի անուններով գյուղեր չեն եղել ՀՀ տարածքում, ընդ որում, ոչ միայն ԽՍՀՄ ժամանակներում, այլև դրանից հետո: Այն պատկերը, որ ցուցադրեցի, ՀՀ դե յուրե ամրագրված տարածքն է»,-ընդգծել էր Փաշինյանը։
Մանյա Պողոսյան
