02.03.2025 | 14:06
Օդի ջերմաստիճանն առաջիկա օրերին աստիճանաբար կբարձրանա 11-13 աստիճանով
«Երեկ չի ստացվել առևանգումը դեպի ՌԴ»․ ՀՔԱՎ-ի ահազանգը 102-րդ ռազմաբազայում նոր ապօրինության մասին. ՏԵՍԱՆՅՈՒԹ
Քաղաքականություն
09.04.2024 | 21:45
Գյումրիում ՌԴ ռազմական ոստիկանության աշխատակիցների կողմից Ռուսաստանի քաղաքացու առևանգման հերթական դեպքն է գրանցվել։ Այս մասին ահազանգում է ՀՔԱ Վանաձորի գրասենյակը։
Փաստաբան Անի Չատինյանն ասում է՝ տեղեկություն են ստացել, որ ՌԴ քաղաքացի Անատոլի Նիկոլաևիչ Շչետինն այժմ ապօրինաբար պահվում է 102-րդ ռազմաբազայում և ՌԴ իրավապահները երեկ փորձել են նրան Հայաստանից տեղափոխել։ Չատինյանի խոսքով՝ Հայաստանի իրավապահ մարմինները պետք է անհապաղ արձագանքեն, որպեզի թույլ չտրվի ՌԴ իրավապահ մարմինների կողմից Հայաստանի տարածքով անձի անարգել տեղափոխումը Ռուսաստան։
ՌԴ իրավապահների կողմից Հայաստանի տարածքում անձի ձերբակալումը խախտում է ՀՀ սուվերենությունը, կարծում է Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը։ Եթե ՌԴ քաղաքացու առևանգման դեպքը հաստատվի, ըստ Գրիգորյանի, ՀՀ կառավարությունը պետք է կոշտ պատասխան տա։
ՀՔԱՎ-ը դիմել է Գլխավոր դատախազություն՝ ՌԴ իրավապահների կողմից ռուս քաղաքացու առևանգման գործով անհապաղ գործողություններ սկսելու նպատակով։ Դատախազությունից Factor.am-ին հայտնեցին, որ ՀՔԱՎ-ի հայտարարությանը սահմանված կարգով ընթացք է տրվել։
Հիշեցնենք՝ նմանօրինակ դեպք էր տեղի ունեցել նախորդ տարվա դեկտեմբերին․ դարձյալ ՀՔԱՎ-ն էր ահազանգել, որ 102-րդ բազայի ռազմական ոստիկանությունը դասալքության մեղադրանքով ձերբակալել է Դմիտրի Լեոնիդովիչ Սետրակովին, որին նույն օրը տեղափոխել էին Ռուսաստան։
Չնայած ՌԴ սահմանապահներին «Զվարթնոց» օդանավակայանից դուրս բերելու որոշման մասին իշխանությունները խոսում են արդեն ավելի քան 1 ամիս, սակայն, ըստ Փաշինյանի, նրանց ժամկետ է տրված մինչև 2024 թվականի օգոստոսի 1-ը։ Թեև քաղհասարակությունը ողջունել էր ռուս սահմանապահներին դուրս բերելու որոշումը, սակայն քննադատության առիթ էր տվել դուրսբերման ժամկետը՝ մատնացույց անելով նմանատիպ դեպքերի կրկնությունից երաշխավորված չլինելը։
Մանրամասները՝ տեսանյութում։
Անի Թամրազյան
