«Ուռա՛»-ի փոխարեն՝ «Կեցցե՛»․ ինչ է փոխվելու ԶՈՒ ներքին ծառայության նոր կանոնագրքում. ՏԵՍԱՆՅՈՒԹ

Ապագայում բանակում «Ուռա՜» բացականչությունը կփոխարինվի «Կեցցե»՛ բառով։ Նման փոփոխություն նախատեսում է Պաշտպանության նախարարությունը ՀՀ ԶՈՒ ներքին ծառայության նոր կանոնագրքում։

«Զորամասերում, զինվորական հաստատություններում տեղի ունեցող հանդիսավոր արարողությունների՝ մասնագիտական տոնին, կազմավորման տարեդարձերին նվիրված և նմանաբնույթ այլ միջոցառումների ընթացքում, օրինակ, երբ վերադասը շնորհավորում է անձնակազմին, շնորհավորանքից հետո արտաբերում է հետևյալ նախադասությունը՝ «Փառք հայրենիքի համար իրենց կյանքը զոհաբերած մեր բոլոր նահատակներին։ Եվ կեցցե՛ Հայաստանի Հանրապետությունը», որին ի պատասխան անձնակազմը պատասխանում է՝ Կեցցե՛, Կեցցե՛, Կեցցե՜»,- Factor TV-ին փոխանցեցին Պաշտպանության նախարարությունից։

Փոփոխված տարբերակն արդեն իսկ գործածվել է ՀՀ բանակի կազմավորման 32-րդ տարեդարձի օրը, նախ՝ վարչապետ Նիկոլ Փաշինյանի, ապա՝ պաշտպանության նախարար Սուրեն Պապիկյանի կողմից։

ՀՀ պաշտպանության առաջին նախարար Վազգեն Սարգսյանը, օրինակ, «հուռա»-ով էր ոգևորության կոչ անում։ Այսօր պետք է «ուռա՞» ասել, թե՞ «կեցցե», ԱԺ պաշտպանության և անվտանգության հանձնաժողովի նախագահը հարցին հպանցիկ է պատասխանում։

Ազգային անվտանգության և ռազմական հարցերով փորձագետ Հրաչյա Արզումանյանը չի կարծում, թե բառային այս փոփոխությունը կարող է Զինված ուժերում որոշիչ դեր խաղալ։ Նա շեշտում է՝ մինչև բառային պարզ փոփոխությանն անդրադառնալը՝ պետք է Զինված ուժերում ավելի հիմնարար բարեփոխումներ կատարվեն։

Ներքին ծառայության կանոնագրքում փոփոխությունների կատարման աշխատանքներն ընթացքի մեջ են, օրենքի նախագծի վերջնական տարբերակը դեռ պատրաստ չէ։ Ըստ ՊՆ-ի՝ կանոնագրքի փոփոխությունները չեն իրականացվում որևէ երկրի ԶՈՒ-ի մոդելին համապատասխանեցնելու նպատակով։

Մանրամասները՝ տեսանյութում։

Ռոզա Վարդանյան