Իսրայելը կոշտ պատասխան է խոստացել Թուրքիային ապրանքների արտահանման սահմանափակումների համար

Իսրայելն արձագանքել է Թուրքիայի որոշմանը՝ Գազայում հակամարտության պատճառով մի շարք ապրանքատեսակների արտահանման սահմանափակումների վերաբերյալ։ Մասնավորապես, Իսրայելի ԱԳ նախարար Իսրայել Կացը X-ում կտրուկ քննադատել է Թուրքիայի նախագահ Ռեջեփ Թայիփ Էրդողանին այդ որոշման համար։ Նա նշել է, որ «Էրդողանը զոհաբերում է Թուրքիայի ժողովրդի տնտեսական շահերը Գազայում ՀԱՄԱՍ-ի մարդասպաններին աջակցելու համար»։

Կացը խոստացել է քայլեր ձեռնարկել Թուրքիայի դեմ՝ մեղադրելով նրան երկու երկրների միջև առևտրային գործարքները խախտելու մեջ։

«Իսրայելը չի ​​ հանդուրժի առևտրային համաձայնագրերի միակողմանի խախտումը և զուգահեռ քայլեր կձեռնարկի Թուրքիայի դեմ, որոնք կվնասեն թուրքական տնտեսությանը»,- գրել է Իսրայելի ԱԳ նախարարը։

Նա հավելել է, որ հրահանգել է պատրաստել ապրանքների ցուցակ, որոնք չեն արտահանի Թուրքիա։

«Հրահանգել եմ նաև կապ հաստատել Միացյալ Նահանգներում երկրների ու կազմակերպությունների հետ՝ դադարեցնելու ներդրումները Թուրքիայում և կանխելու Թուրքիայից ապրանքների ներկրումը, նաև խնդրել ԱՄՆ Կոնգրեսում մեր ընկերներին՝ ուսումնասիրել բոյկոտի օրենքի խախտումները և համապաստան պատժամիջոցներ կիրառել Թուրքիայի դեմ»,- գրել է Իսրայել Կացը։

Թուրքիայի առևտրի նախարարությունն այսօր ավելի վաղ հայտնել էր, որ Անկարան 2024 թվականի ապրիլի 9-ից սահմանափակում է որոշ ապրանքների արտահանումը Իսրայել։ Այս որոշումը վերաբերում է ապրանքների 54 խմբի՝ ալյումին, պողպատ, ցեմենտ, մարմար, կերամիկա և այլն։