ՌԴ-ն Ղազախստանից բենզին է խնդրել՝ ուկրաինական հարձակումների պատճառով դեֆիցիտի դեպքում

Ռուսաստանը խնդրել է Ղազախստանին պատրաստ լինել 100,000 տոննա բենզին մատակարարել՝ ուկրաինական անօդաչու թռչող սարքերի հարձակումների և մատակարարման խափանումների պատճառով դեֆիցիտի դեպքում, Reuters-ին հայտնել են արդյունաբերության ոլորտում երեք աղբյուրներ:

Աղբյուրներից մեկը հայտնել է, որ Ռուսաստանի համար ղազախական պաշարներն օգտագործելու գործարքն արդեն համաձայնեցված է։ Մոսկվան Ղազախստանին խնդրել է ստեղծել 100 հազար տոննա բենզինի պահուստ, որը պատրաստ կլինի Ռուսաստան առաքման համար, ասել են աղբյուրները:

Ռուսաստանի և Ղազախստանի էներգետիկայի նախարարությունները դեռևս չեն պատասխանել Reuters-ի մեկնաբանությունների խնդրանքին։

Հարևան Բելառուսն արդեն համաձայնել է օգնել Ռուսաստանին բենզինի մատակարարումների հարցում, գրում է գործակալությունը։

Տարեսկզբից ուկրաինական անօդաչու թռչող սարքերի հարձակումների ինտենսիվությունը ռուսական նավթավերամշակման գործարանների և նավթային պահեստների ուղղությամբ ավելացել է։ Ռուսաստանում բենզինի արտադրությունը նվազել է, իսկ գները սկսել են աճել։

ՌԴ իշխանություններն ասում են, որ վառելիքի ներքին շուկաներում իրավիճակը դեռևս կայուն է, իսկ պաշարները բավականին մեծ են։ Այնուամենայնիվ, Մոսկվան մարտի 1-ից վեց ամսով արգելք է դրել բենզինի արտահանման վրա՝ կանխելու վառելիքի սուր դեֆիցիտը, թեև դա չի տարածվում Մոսկվայի գլխավորած Եվրասիական տնտեսական միության անդամ պետությունների վրա։

Մասնագետների կարծիքով, սակայն, արգելքը կարող է ընդլայնվել, եթե Ռուսաստանում իրավիճակը վատթարանա։