Քաղաքականություն
08.04.2024 | 21:32
Ադրբեջանի Մեդիայի զարգացման գործակալությունն ու պետական անվտանգության ծառայությունը հայտարարություն են տարածել, որ վերջին օրերին որոշ սոցցանցերում մի շարք անձինք հրապարակում են անհիմն տեղեկություններ, որոնք չեն արտացոլում իրականությունը հայ-ադրբեջանական սահմանին լարվածության աճի, ադրբեջանական բանակում զոհվածների և վիրավորների առկայության, զորամասերը և ծանր հրետանային զինատեսակները պատրաստության վիճակի բերելու, Լաչինի շրջանում պարետային ժամ սահմանելու մասին։
Հաղորդվում է, որ Պետական անվտանգության ծառայության կողմից իրականացված հետաքննության արդյունքում պարզվել է, որ այդ տեղեկատվությունը տարածող անձինք են Ադրբեջանի քաղաքացիներ Ալիև Ռաշադը՝ ծնված 1977 թվականին և Մելիքով Փարվիզը՝ ծնված 1973 թվականին։ Ձեռնարկվել են անհրաժեշտ իրավական միջոցառումներ՝ նման տեղեկատվության տարածումը կանխելու համար։
Ադրբեջանական վերոնշյալ կառույցները զգուշացնում են, որ նման արարքների կատարումը ենթադրում է լուրջ իրավական պատասխանատվություն։
Օրերս էլ Ադրբեջանի ՆԳՆ-ն հայտնել էր, որ սոցցանցերի ադրբեջանական տիրույթում տարածվել են ռազմական գործողությունների, ինչպես նաև տեխնիկայի տեղաշարժի ու զոհերի մասին հրապարակումներ։ Ոստիկանության ծառայողների ձեռնարկած միջոցառումների արդյունքում պարզվել էր «այդ կեղծ լուրերը տարածող անձանց ինքնությունը»։
