Ալիևն ընդունել է Թուրքիայի պաշտպանական արդյունաբերության կոմիտեի նախագահին

Ադրբեջանի  նախագահ Իլհամ Ալիևն ընդունել է Թուրքիայի նախագահի աշխատակազմի պաշտպանական արդյունաբերության կոմիտեի նախագահ Հալուք Գյորգյունի գլխավորած պատվիրակությանը։

Ադրբեջանական լրատվամիջոցների հաղորդմամբ՝ թուրքական  պատվիրակության կազմում են ASELSAN ընկերության գլխավոր տնօրեն Ահմեդ Աքյոլը, ASFAT ընկերության գլխավոր տնօրեն Բեհչեթ Քարաթաշը, HAVELSAN ընկերության գլխավոր տնօրեն Մեհմեդ Աքիֆ Նաջարը, «REPKON Grup» ընկերության նախագահ Իբրահիմ Քյուլեքչին, «ROKETSAN» ընկերության գլխավոր տնօրեն Մուրադ Իքինջին, «Defense Technologies and Engineering» ընկերության գլխավոր տնօրեն Օզգուր Գյուլերյուզը, «Թուրքիայի ավիացիոն և տիեզերական արդյունաբերություն – TUSAŞ» ընկերության գլխավոր տնօրեն Թեմել Քոթիլը։

Ալիևը նշել է, որ «թուրքական ռազմարդյունաբերական համալիրի արտադրանքն իր որակի և արդյունավետության շնորհիվ արդեն իսկ համաշխարհային ճանաչում ունի»։ Ըստ նրա՝ լուրջ քայլեր են ձեռնարկվել Ադրբեջանում պաշտպանական արդյունաբերության զարգացման ուղղությամբ, և թուրքական առաջատար ընկերությունների պատվիրակության այցը  երկիր «լավ հնարավորություններ է ստեղծել՝ քննարկելու համագործակցության հեռանկարները»։

Գյորգյունն էլ  իր հերթին հայտնել  է  թուրքական պատվիրակության ընկերությունների և Ադրբեջանի պաշտպանական արդյունաբերության ընկերությունների միջև մի քանի ուղղություններով համատեղ գործունեության վերաբերյալ փոխըմբռնման հուշագրերի ստորագրման մասին։