08.07.2026 | 13:49
Թրամփը հայտարարել է, որ Իրանի հետ հրադադարն ավարտվել է
Մայիսի 3-ին դատավորների ընդհանուր ժողով է հրավիրվել ԲԴԽ անդամի ընտրության օրակարգով
Հասարակություն
02.04.2024 | 13:49
Մայիսի 3-ին դատավորների ընդհանուր ժողով է հրավիրվել։ Այս մասին տեղեկանում ենք Բարձրագույն դատական խորհրդի կայքից։ Օրակարգում Բարձրագույն դատական խորհրդի անդամի ընտրության հարցն է։ Նշենք, որ Բարձրագույն դատական խորհրդի դատավոր անդամի տեղը ԲԴԽ-ում թափուր է, քանի որ ԲԴԽ անդամ, դատավոր Արշակ Վարդանյանը փետրվարի 27-ին հրաժարականի դիմում է ներկայացրել։ Վարդանյանը Վերաքննիչ քրեական դատարանից ընտրված դատավոր էր, ուստի այժմ այս դատարանի դատավորի տեղն է թափուր ԲԴԽ-ում։ Խորհրդի անդամի ընտրությունը պետք է տեղի ունենար մարտի 29-ին նշանակված Դատավորների ընդհանուր ժողովի ընթացքում, սակայն ժողովից 1 օր առաջ միակ թեկնածուն՝ Վազգեն Ռշտունին հայտարարություն է տարածել՝ հայտնելով, որ չի հավակնում ԲԴԽ անդամ դառնալ։
Առանց հստակ պատճառներ նշելու Ռշտունին հայտնել է, որ վերջին օրերին տեղի են ունեցել իրադարձություներ, որոնցով պայմանավորված է կայացրել որոշումը:
«Ինձ համար մեծագույն պատիվ կլիներ դատավորներին տվյալ մարմնում ներկայացնելը, սակայն նժարին դրված էին իմ անձի հետ առնչություն չունեցող հարցեր, որոնք, իմ գնահատմամբ, ավելի կարեվոր են, քան Բարձրագույն դատական խորհրդի անդամ դառնալը. հակառակ մոտեցումը կարող էր գնահատվել եսասիրական»,- հայտարարության մեջ նշել է Վազգեն Ռշտունին՝ հայցելով դատավորների ներողամտությունը, որոնք իր՝ Բարձրագույն դատական խորհրդի անդամ դառնալու հետ կապված դրական սպասումներ են ունեցել։
Նշենք, որ Դատավորների ընդհանուր ժողովի օրը՝ մարտի 29-ին Factor TV-ի հարցին ի պատասխան Վերաքննիչ քրեական դատարանի նախագահ Մխիթար Պապոյանը չի բացառել, որ այժմ էլ կարող է ինքն առաջադրվել որպես ԲԴԽ անդամի թեկնածու։
Արաքս Մամուլյան
