07.10.2026 | 23:48
Արթուր Դանիելյանը կալանավորվեց
Իրանն Իսրայելին մեղադրել է Դամասկոսում իր հյուպատոսությանը հարված հասցնելու մեջ
Քաղաքականություն
02.04.2024 | 11:41
Իրանի Իսլամական հեղափոխության պահապանների կորպուսի (ԻՀՊԿ) երկու գեներալներ՝ Մոհամմադ Ռեզա Զահեդին և Մոհամմադ Հադի Հաջա Ռահիմին, զոհվել են Սիրիայի մայրաքաղաք Դամասկոսում Իրանի հյուպատոսարանի մոտ ավիահարվածի հետևանքով, որը Թեհրանի պնդմամբ իրականացվել է Իսրայելի կողմից։ Այս մասին հայտնել են իրանական լրատվամիջոցները՝ հղում անելով Իսլամական հեղափոխության պահապանների կորպուսի մամուլի ծառայությանը։ Նրանցից բացի սպանվել է ԻՀՊԿ-ի ևս հինգ սպա, գրում է DW-ի ռուսական ծառայությունը։
Զահեդին 2006-2009 թվականներին եղել է Իսլամական հեղափոխության պահապանների կորպուսի ցամաքային զորքերի հրամանատարը և ղեկավարել է ԻՀՊԿ-ի գործողությունները 2017 թվականից: Ընդհանուր առմամբ, հարվածի հետևանքով զոհվել է 11 մարդ, ևս մի քանիսը վիրավորվել են, հայտնում է Մարդու իրավունքների սիրիական դիտորդական կենտրոնը: Տեղական լրատվամիջոցների փոխանցմամբ՝ հարվածը եղել է հյուպատոսության հարակից շենքին, որն ամբողջությամբ ավերվել է։
Իրանի արտաքին գործերի նախարար Հոսեյն Ամիր Աբդոլլահիանը հայտարարել է, որ Թեհրանն Իսրայելին է պատասխանատու համարում հարձակման համար: Դամասկոսում Իրանի հյուպատոսության վրա հարվածը «բոլոր միջազգային կոնվենցիաների խախտում է», ասել է Աբդոլլահիանը։
Իսրայելական բանակը հայտարարել է, որ չի մեկնաբանում այս հայտարարությունները:
