24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Ուրսուլա ֆոն դեր Լեյենի դեմ հայցով սկսել է զբաղվել ԵՄ դատախազությունը․ Politico
Քաղաքականություն
01.04.2024 | 23:13
ԵՄ դատախազությունը փոխարինել է բելգիացի դատախազներին, որոնք հետաքննում են ՝«կառավարության գործառույթներին միջամտելու, ապացույցների ոչնչացման, կոռուպցիայի և շահերի բախման» մասին Եվրահանձնաժողովի ղեկավար ՈՒրսուլա ֆոն դեր Լեյենի դեմ գործը, հաղորդում է Politico-ն՝ վկայակոչելով իր աղբյուրները: ԵՀ ղեկավարին կասկածում են Pfizer-ի գործադիր տնօրեն Ալբերտ Բուրլայի հետ 2021 թվականին կորոնավիրուսի դեմ պատվաստանյութերի գնման պայմանագրի գործով։
ԵՄ դատախազությունը ղեկավարում է ֆինանսական հանցագործությունների համաեվրոպական հետաքննությունը և իրավունք ունի առգրավել հեռախոսներ և այլ սարքավորումներ Եվրահանձնաժողովի գրասենյակներում, ինչպես նաև խուզարկություններ իրականացնել եվրոպական երկրներում։
«Այդ առումով անհրաժեշտ ամեն ինչ ասվել և արվել է, մենք կսպասենք արդյունքներին», – ասել է Լեյենը։ Միաժամանակ, ԵՀ ղեկավարը չի հաստատում Ալբերտ Բուրլայի հետ նամակագրության փաստը։
Ուրսուլա ֆոն դեր Լեյենի դեմ պատվաստանյութերի գնման պայմանագրերի վերաբերյալ հայցը բելգիական դատարան է ներկայացվել 2023 թվականին։ Նախնական հայցվորը լոբբիստ Ֆրեդերիկ Բալդանն էր, որը ԵՀ ղեկավարին մեղադրել է իշխանության չարաշահման մեջ։ Այնուհետև նրան միացել են Հունգարիան եւ Լեհաստանը, սակայն վերջինը հրաժարվել է իր պահանջներից այն բանից հետո, երբ Դոնալդ Տուսկը վերադարձել է կառավարություն։
Ուրսուլա ֆոն դեր Լեյենը Եվրահանձնաժողովի ղեկավարն է 2019 թվականից։ Ֆոն դեր Լեյենի և դեղագործական ընկերության ղեկավարի նամակագրության մասին առաջին անգամ հայտնել է The New York Times-ը 2021 թվականին։ 2024 թվականի մարտի 7-ին Եվրոպական ժողովրդական կուսակցությունը՝ Եվրախորհրդարանի ամենամեծ խմբակցությունը, Լեյենին առաջադրել է նոր ժամկետի համար։
