Ընտրություններում պարտությունից հետո Էրդողանի նախագահությամբ տեղի կունենա իշխող ուժի գործադիր խորհրդի առաջին նիստը

Թուրքիայում մարտի 31-ին տեղի ունեցած ՏԻՄ  ընտրություններից հետո իշխող «Արդարություն ու զարգացում» կուսակցության կենտրոնական գործադիր խորհրդի առաջին նիստը տեղի կունենա վաղը, հայտնում են թուրքական լրատվամիջոցները։

Երկրի ու կուսակցության ղեկավար Ռեջեփ Թայիփ Էրդողանի նախագահությամբ կայանալիք հանդիպմանը նախատեսվում է վերլուծել ընտրությունների արդյունքները։ Համեմատություններ կկատարվեն նախորդ ընտրությունների հետ՝ շրջան առ շրջան։ Այս համատեքստում ակնկալվում է, որ հանդիպմանը ելույթ կունենան տեղական ինքնակառավարման մարմինների,  կուսակցության նախագահության ներկայացուցիչներ։

Կենտրոնական գործադիր խորհրդի նիստից հետո ԱԶԿ-ի խոսնակ Օմեր Չելիքը հանդես կգա օրակարգի և հանդիպման վերաբերյալ հայտարարությամբ։

Նշենք, որ քվեաթերթիկների 100 տոկոսի հաշվարկի նախնական արդյունքներով ընդդիմադիր Ժողովրդահանրապետական կուսակցությունը՝ CHP-ն,  հավաքել է ձայների ավելի քան 37,76 տոկոսը, ԱԶԿ-ն՝ 35,48 տոկոսը։

Անկարայում ընդդիմադիր գործող քաղաքապետ Մանսուր Յավաշը հավաքել է  ձայների 60,38 տոկոսը, ԱԶԿ-ի թեկնածու Թուրգուտ Ալթինոքը 31,69 տոկոսը, Ստամբուլում գործող քաղաքապետ Էքրեմ Իմամօղլուն 51,14 տոկոսը, Էրդողանի թեկնածու Մուրադ Քուրումը 39,59 տոկոսը, Իզմիրում ընդդիմադիր Ջեմիլ Թուգայը ստացել է ձայների 48,96 տոկոսը, իշխող ուժից Համզա Դաղը 37,06 տոկոսը։ Թուրքիայում բոլոր խոշոր քաղաքներում հաղթել է ընդդիմությունը։

Էմմա Չոբանյան