Քաղաքականություն
01.04.2024 | 22:46
Ադրբեջանի նախագահ Իլհամ Ալիևը հրամանագիր է ստորագրել Արցախի մի շարք շրջանների՝ Ստեփանակերտի, Իվանյանի ու Մարտակերտի շրջանների «վերակառուցման, շինարարության և կառավարման ծառայություն» ստեղծելու և դրա գործունեությունն ապահովելու մասին։
Նշվում է, որ ծառայության կանոնադրական կապիտալը սահմանվել է 500 հազար մանաթ և ձևավորվելու է Ադրբեջանի պետական բյուջեից։ Ծառայության նպատակն է պահպանել, աջակցել նոր բազմաբնակարան և անհատական բնակելի շենքերի կառուցմանը, բարեկարգմանը, բնակարանային և կոմունալ ծառայությունների ոլորտում գործունեությանը։
Ընթացիկ կառավարումն իրականացնում է 5 հոգուց բաղկացած դիտորդական խորհուրդը, որի նախագահն է Արցախի նշյալ բնակավայրերում Ալիևի ներկայացուցիչ Էլչին Յուսուբովը։ Խորհրդի անդամներն են Ադրբեջանի էկոնոմիկայի նախարարի առաջին տեղակալ Էլնուր Ալիևը, գյուղատնտեսության նախարարի տեղակալ Սարվան Ջաֆարովը, աշխատանքի և բնակչության սոցիալական պաշտպանության փոխնախարար Անար Քերիմովը, քաղաքաշինության և ճարտարապետության պետական կոմիտեի նախագահի առաջին տեղակալ Նամիգ Գումբետովը։
