04.06.2026 | 09:55
ՀՀ տարածքում ավտոճանապարհները հիմնականում անցանելի են
Փաշինյանը չի պատրաստվում հրաժարական տալ․ խոսնակը հերքում է լրատվամիջոցներով տարածվող լուրը
01.04.2024 | 12:11
Այսօր հայկական լրատվամիջոցներից մեկը լուր է հրապարակել, գրելով, թե վարչապետ Նիկոլ Փաշինյանը կուսակցության հրատապ նիստ է գումարել և որոշում է կայացրել հրաժարական տալ։
«Նիկոլ Փաշինյանը կուսակցության հրատապ նիստ է գումարել։ Ադրբեջանի պահանջները Տավուշի անկլավների վերաբերյալ այնքան են խորացել, որ այդ օրավիճակը թուլացնելու համար Փաշինյանը որոշում է կայացրել հրաժարական տալ։։
Ըստ նրա՝ սա իր և իր կառավարության փրկությունն է լինելու։ Փաշինյանը քննարկել է և որոշում է կայացրել, որ արտահերթ խորհրդարանական ընտրություններ տեղի կունենան սեպտեմբերի 10-ին։
Սա ևս մեկ շանս է Փաշինյանի համար սեփական կաշին փրկելու»։
Ուշագրավ է, որ լրատվամիջոցը լուրը հրապարակել է «Կ․» մակագրությամբ, ինչից ենթադրելի է, որ այն ապրիլմեկյան կատակ է։ Չնայած դրան՝ այլ առցանց լրատվամիջոցներ սկսել են կիսվել դրանով․ ավելին՝ լուրը տարածում է գտել նաև
ադրբեջանական մեդիա-տիրույթում։
Factor.am-ը վարչապետի մամուլի խոսնակ Նազելի Բաղդասարյանից հետաքրքրվեց, արդյո՞ք Փաշինյանն իսկապես մտադիր է հրաժարական տալ։ Բաղդասարյանը լուրն անլուրջ որակեց։
«Քաղաքացիական պայմանագիր» կուսակցության պատգամավոր, վարչության փոխնախագահ Վահագն Ալեքսանյանը ևս հերքեց տարածվող տեղեկությունը։
Մանյա Պողոսյան
