08.04.2026 | 01:11
Խարբերդի ամառանոցներից դեպի Նուբարաշեն ավտոճանապարհին 5 մեքենա է բախվել. 3 անձ հոսպիտալացվել է
Բայրամովը հայտարարել է, թե ՀՀ-ԱՄՆ-ԵՄ հանդիպումը «կնպաստի Հայաստանի նոր սադրանքներին»
Քաղաքականություն
29.03.2024 | 19:26
Ադրբեջանի արտաքին գործերի նախարար Ջեյհուն Բայրամովը ՌԴ ԱԳՆ հատուկ նշանակության դեսպան Պավել Կնյազևի հետ հանդիպմանը քննարկել է Ադրբեջանի և Ռուսաստանի միջև երկկողմ և բազմակողմ համագործակցության օրակարգային հարցեր, ինչպես նաև տարածաշրջանում առկա իրավիճակը, ադրբեջանական լրատվամիջոցները։
Խոսելով տարածաշրջանում ստեղծված իրավիճակի մասին՝ Բայրամովն ասել է, թե մի շարք քայլեր կան, որոնք նոր մարտահրավերներ են ստեղծում խաղաղության գործընթացի առաջխաղացման համար, իսկ տարածաշրջանից հեռու գտնվող երկրների քայլերը, նրանց միակողմանի դիրքորոշումը դանդաղեցնում է այդ գործընթացը։
«Հանդիպման ընթացքում ընդգծվել է, որ այս ուղղությամբ Ադրբեջանի դիրքորոշումը հստակ արտահայտվել է ԵՄ-Հայաստան-ԱՄՆ համատեղ համաժողովի կազմակերպման վերաբերյալ, որը կանցկացվի այս տարվա ապրիլի 5-ին ոչ թափանցիկ և ոչ ներառական միջավայրում, ինչպես նաև մտահոգությունները, որ նման նախաձեռնությունները կարող են նպաստել Հայաստանի նոր սադրանքներին, որտեղ գերակշռում են ռևանշիստական տրամադրությունները։ Նշվել է, որ չնայած առկա դժվարություններին և մարտահրավերներին՝ Ադրբեջանը վճռական է՝ շարունակել աշխատանքը տարածաշրջանային խաղաղության և կայունության ապահովման ուղղությամբ»,- ասվում է Ադրբեջանի ԱԳՆ-ի հայտարարության մեջ։
Նշենք, որ եռակողմ հանդիպումը տեղի է ունենալու ապրիլի 5-ին Բրյուսելում՝ ՀՀ վարչապետ Նիկոլ Փաշինյանի, ԱՄՆ պետքարտուղար Էնթոնի Բլինքենի ու Եվրահանձնաժողովի նախագահ Ուրսուլա ֆոն դեր Լեյենի մասնակցությամբ։ Ավելի վաղ հանդիպման վերաբերյալ իրենց դժգոհություններն էին հայտնել Ադրբեջանի ԱԳՆ-ն ու ՌԴ ԱԳՆ պաշտոնական ներկայացուցիչ Մարիա Զախարովան։
Էմմա Չոբանյան
