Թումանյան փողոցում տեղի ունեցած միջադեպի գործով անցնող բոլոր անձինք հարցաքննվել ու ազատ են արձակվել

«Ազգային առաջընթաց» կուսակցության անդամների և այլ քաղաքացիների միջև երեկ տեղի ունեցած միջադեպի առթիվ քրեական վարույթ է նախաձեռնվել Քրեական օրենսգրքի 297-րդ հոդվածի 2-րդ մասի 1-ին կետով (մի խումբ անձանց կողմից խուլիգանությունը)։

Այս մասին Factor TV-ի հետ զրույցում ասաց Քննչական կոմիտեի մամուլի խոսնակ Գոռ Աբրահամյանը:
Վերջինիս խոսքով` այս պահին արգելանքի տակ գտնվող անձ չկա, Ոստիկանությունից Քննչական կոմիտե տարված բոլոր 11 անձինք հարցաքննվել ու ազատ են արձակվել:

Հիշեցնենք, որ Երևանի ավագանու «Ազգային առաջընթաց» խմբակցության նախկին անդամ Հայկ Մարությանը «Ֆեյսբուք»-ի իր էջով ահազանգել է, որ հարձակվել են իրենց խմբակցության անդամների վրա, և նրանցից երկուսը տարվել են Ոստիկանություն:

«Այսօր մի քանի խուլիգաններ հանրային վայրում հարձակվել են Երեւանի ավագանու մեր «Ազգային առաջընթաց» խմբակցության անդամների վրա, որոնք իրենց քաղաքացիական դիրքորոշումն էին արտահայտում Երեւանի կանաչ ֆոնդի ոչնչացմանը միտված՝ ՔՊ իշխանության քաղաքականության հանդեպ»,- հայտնել էր Մարությանը` նկատի ունենալով այն հանգամամքը, որ Թումանյան փողոցում երեկ ծառեր են հատվել:

«Իշխանության որդեգրած՝ քաղաքական հալածանքների այս գործելաոճը պայմանավորված է բացառապես նրանց ստեղծված թայֆայական համերաշխության եւ անպատժելիության մթնոլորտով։ Իրավապաշտպան կազմակերպություններին հորդորում ենք համապատասխան գնահատական տալ իշխանության կամայականություններին»,- գրել էր Հայկ Մարությանը:

ՀՀ ՆԳՆ հանրային հաղորդակցության և իրազեկման վարչությունից Factor TV-ին հայտնել են, որ խուլիգանության կասկածանքով կա 11 ձերբակալված, որոնք ներկայացվելու են Քննչական կոմիտե:

Արաքս Մամուլյան