19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Զենք տուր, կռվենք․ Կիրանց գյուղի բնակիչների պահանջը՝ Փաշինյանից. ՏԵՍԱՆՅՈՒԹ
Քաղաքականություն
22.03.2024 | 20:01
Ենթադրյալ ադրբեջանական Խեյրիմլի գյուղը, որի շուրջ քննարկումները վերջին օրերին կրկին վերսկսվել են, ներառում է տարածք, որը սահմանակից է Կիրանց գյուղին։ Բնակիչները նշում են, որ եթե ստեղծվի իրավիճակ՝ ադրբեջանցիներն առաջ գան, ապա այս ճանապարհը, որը գյուղը կապում է Իջևանի հետ, անցնելու է ադրբեջանական կողմին։
Ադրբեջանցիները հիմա այստեղից մոտ երեք կիլոմետր հեռավարության վրա են։ Կիրանցի բնակիչ Վաչագան Գրիգորյանն ասում է՝ եթե այս տարածքները հանձնվեն, ապա իր խանութից հենց դուրս գա՝ զինված թշնամուն է տեսնելու։
Վաչագանը շաբաթվա սկզբին անձամբ Նիկոլ Փաշինյանից է լսել, որ իրենց զիջումներ են պարտադրված։
Դեռևս 2021 թվականին Փաշինյանը նախընտրական այցի շրջանակում Կիրանցի բնակիչներին հույսով էր արել ու պողպատե մանդատ ստացել։ Մհերն արձանագրում է՝ վարչապետն իր թախանձագին խնդրանքների ճիշտ հակառակն է արել։
Մհերը մտահոգված է՝ ադրբեջանցիները զենքը վերցնելու են, գան ու կանգնեն իր տնից մի քանի մետր այն կողմ։ Ինչպե՞ս թողնի ու գնա․ մի քանի տարի առաջ էր ավարտել ադրբեջանցիների կողմից դեռևս 90-ականներին կրակի տված տան վերանորոգումը։
Մհերն այս հարցը տվել է իր հետ իջևանյան նույն բակերից մեկում ապրած Փաշինյանին, բայց պատասխան չի ստացել։
Կիրանցի բնակիչներին հայտնի չէ՝ ո՞ր քարտեզով է Փաշինյանը Հայաստանի սահմաններից դուրս թողնում ռազմավարական նշանակության ավտոճանապարհը, տնամերձ հողատարածքները, ջրագիծն ու այլ ենթակառուցվածքներ։
Հայաստանի տարածքը միլիմետրի ճշգրտությամբ իմանալու մասին հայտարարած վարչապետից այս գյուղում պահանջում են, որ հնարավորություն ունենան իրենց տներում անվտանգ ապրել, բայց Փաշինյանը, իր սիրած դուխը տալու փոխարեն, գյուղացիների հետ հանդիպմանը նոր վախեր է առաջացրել։
Կիրանցի բնակիչ Գառնիկը չգիտի՝ հարևանը կհասցնի՞ ապրել իր կառուցած տանը, թե՝ չէ։ Ստացել են պետության տված 16 մլն դրամի աջակցությունը, սկսել շինարարությունը, բայց հիմա, Փաշինյանի խոսքերը լսելուց հետո, անորոշության մեջ են։ Գառնիկն ասում է՝ զենք կվերցնի ու իր կառուցած տունը կպաշտպանի, բայց կասկածում է, որ պետությունն այս հարցում իրենց կողքին կկանգնի։
Կիրանցում Նիկոլ Փաշինյանին առաջարկում են ադրբեջանական գյուղերի վերադարձի թեման ջանասիրությամբ օրակարգ բերելուն զուգահեռ՝ խոսել նաև թշնամու ձեռքին գտնվող հայկական հողերի վերադարձի հարցը։
Կիրանցի հիմնական զբաղմունքը գյուղատնտեսությունն է։ Բնակիչներն ահազանգում են՝ անասնապահությամբ այլևս չեն կարողանա զբաղվել, զրկվելու են արոտավայրերից։
Մանրամասները՝ տեսանյութում։
Նարեկ Կիրակոսյան
