Յամալո-Նենեցի դատարանը մերժել է Նավալնիի մոր հայցն ընդդեմ գաղութի` որդուն ոչ պատշաճ բժշկական օգնություն ցուցաբերելու համար

ՌԴ Լաբիթնանգի քաղաքի դատարանը կարճել է ընդդիմադիր գործիչ Ալեքսեյ Նավալնիին ոչ պատշաճ բժշկական օգնություն ցուցաբերելու համար գաղութի և Դաշնային քրեակատարողական ծառայության վարչակազմի դեմ վարչական հայցի վերաբերյալ վարույթը, որն ավելի վաղ ներկայացրել էր գործչի մայրը՝ Լյուդմիլա Նավալնայան: Այս մասին հայտնել է Հակակոռուպցիոն հիմնադրամի ղեկավար Իվան Ժդանովը։

Դատարանում գործի կարճումը հիմնավորվել է նրանով, թե նման խնդրով հայցվոր կարող էր լինել միայն Ալեքսեյ Նավալնին։ Բացի այդ, նշվել է, որ Լյուդմիլա Նավալնայայի հայցում չի նշվում, թե ինչպես են իր իրավունքները, ազատությունները և օրինական շահերը ոտնահարվել պատասխանող կողմի կողմից, ինչպես նաև այն պատճառները, որոնք կարող են հանգեցնել նրա իրավունքների խախտմանը:

«Ալեքսեյը բազմիցս հայցեր է ներկայացրել գաղութների դեմ՝ բժշկական օգնություն չցուցաբերելու համար։ Հայցերը մերժվել են։ Հիմա մերժում են նրա հարազատների հայցը՝ ծաղրական ձևակերպումներով»,- նշել է Ժդանովը։

Ռուս ընդդիմադիր գործիչ Ալեքսեյ Նավալնին մահացել է փետրվարի 16-ին Յամալո-Նենեց ինքնավար օկրուգի Խարպ գյուղում գտնվող «Բևեռային գայլ» հատուկ ռեժիմի գաղութում։ Նրա մահվան եզրակացության մեջ նշվում է, որ պատճառները բնական են։ «Հակակոռուպցիոն հիմնադրամը» ստեղծողի կողմնակիցները կարծում են, որ նրան սպանել են։ Բանտարկության ընթացքում Նավալնիին 27 անգամ պատժախուց են ուղարկել։

Ալեքսեյ Նավալնիի մարմինը մորն են հանձնել միայն փետրվարի 24-ին։ Մինչ այդ, մայրը բողոքել էր Քննչական կոմիտեի վերջնագրից, որը պահանջում էր համաձայնել Նավալնիին առանց հրապարակային հրաժեշտի, գաղտնի հուղարկավորություն իրականացնել։ Լյուդմիլա Նավալնայան հրաժարվել է կատարել այս պահանջը։ Նավալնիի հուղարկավորությունը տեղի է ունեցել մարտի 1-ին Մոսկվայում՝ Բորիսովյան գերեզմանատանը։ Չնայած կալանավորման սպառնալիքներին՝ հազարավոր մարդիկ են մասնակցել քաղաքական գործչի վերջին հրաժեշտի արարողությանը։