Վերջին տասը տարիները ռեկորդային շոգ են եղել․ ՄԱԿ

Անցած 10 տարին եղել է ամենաշոգ տասնամյակն այն պահից, երբ սկսվել են կլիմայական դիտարկումները: Այս մասին ասված է ՄԱԿ-ի Համաշխարհային օդերեւութաբանական կազմակերպության (WMO) հրապարակած զեկույցում։

2023 թվականը սահմանեց բացարձակ ջերմաստիճանային ռեկորդ, սակայն 2024 թվականը կարող է ավելի շոգ լինել, զգուշացնում են փորձագետները: Երկրի մակերևույթի գլոբալ օդի միջին ջերմաստիճանն անցյալ տարի 1,45 աստիճանով բարձր է եղել, քան նախաարդյունաբերական դարաշրջանում, գրում է DW-ի ռուսական ծառայությունը։

Այսպիսով, աշխարհն ավելի քան երբևէ մոտ է 1,5 աստիճանի նշագծին։ Լավագույն դեպքում՝ հենց այս ցուցանիշով էր նախատեսվում դադարեցնել գլոբալ տաքացումը՝ համաձայն 2015 թվականի Փարիզի համաձայնագրի (վատագույն դեպքում՝ մոտ երկու աստիճան):

2023 թվականին կլիմայի տաքացումը հանգեցրել է սառցադաշտերի տարածքի ռեկորդային կրճատման։ Սա առավել ցայտուն է արտահայտվել Եվրոպայում և Հյուսիսային Ամերիկայում, օրինակ, Շվեյցարիայում սառցադաշտերի տարածքը վերջին երկու տարվա ընթացքում նվազել է 10 տոկոսով:

Բացի այդ, WMO-ի փորձագետներն անցյալ տարի գրանցել են մի քանի ջերմային ալիք, որոնք անցել են համաշխարհային օվկիանոսների 90 տոկոսով՝ սպառնալով կորալային խութերին և այլ ծովային էկոհամակարգերի:

«Նախկինում մենք երբեք այսքան մոտ չենք եղել Փարիզի համաձայնագրով սահմանված ստորին սահմանին (գլոբալ տաքացման)»,- ասել է WMO ղեկավար Սելեստե Սաուլոն:

Նրա խոսքով՝ կազմակերպության զեկույցը պետք է լինի «կարմիր նախազգուշական ազդանշան ամբողջ աշխարհի համար»:

«Մոլորակը գտնվում է անդունդի եզրին»,- իր հերթին հայտարարել է ՄԱԿ-ի գլխավոր քարտուղար Անտոնիո Գուտերեշը:

Վերջին տարիներին ջերմաստիճանի բազմաթիվ ռեկորդները, ըստ նրա, ցույց են տալիս, որ հանածո վառելիքի այրումը սպառնում է աշխարհին «կլիմայական քաոսով»։