Քաղաքականություն
19.03.2024 | 23:20
Թուրքիայի զբոսաշրջության ոլորտը կարող է խնդիրների բախվել, քանի որ բանկերին հյուրանոցների պարտքը հասնում է 10 միլիարդ դոլարի, գրում է Cumhuriyet պարբերականը։
«Չնայած Մշակույթի և զբոսաշրջության նախարարությունն ու Թուրքիայի վիճակագրական ինստիտուտը (TUIK) պնդում են, որ զբոսաշրջությունը ռեկորդներ է գրանցել, և անցյալ տարի երկիր է ժամանել ավելի քան 56 միլիոն զբոսաշրջիկ, իրականությունն այդպիսին չէ։ Զբոսաշրջության ոլորտի ներկայացուցիչների խոսքով՝ համաճարակից հետո հյուրանոցների պարտքերը մոտենում են 10 միլիարդ դոլարի, իսկ բանկերի կողմից հյուրանոցների տիրանալու ռիսկը մեծացել է՝ պայմանագրերի ավարտի պատճառով»,- գրում է պարբերականը։
Ոլորտի ներկայացուցիչներն ասում են, որ զբոսաշրջության ոլորտում այս զարգացումները մտահոգության տեղիք են տալիս։
«Երկիրը չունի բավարար տեղեր 56 միլիոն զբոսաշրջիկների ընդունելու համար, այս տարի 60 միլիոն զբոսաշրջիկի նպատակը նույնպես երազանք է մնում»,- ընդգծում է թերթը։
Հրապարակման համաձայն՝ թուրքական հյուրանոցները քովիդի համաճարակն ավարտել են 8,5 միլիարդ դոլարի վարկային պարտքով։
«Հյուրանոցների 70%-ը հասել է այս օրվան բանկերի հետ լոյալության պայմանագրերի պատճառով, ներկայում պարտքը հասել է մինչև 10 մլրդ դոլարի։ Եթե զբոսաշրջությունից շատ եկամուտներ են գոյացել, ինչո՞ւ է պարտքն ավելացել։ Հյուրանոցների 70-75%-ը գրավադրված է բանկերին։ Բանկերը հյուրանոցների սեփականատերերին ասում են, որ վաճառեն իրենց հյուրանոցները և մարեն պարտքերը»,- ասվում է հոդվածում։
