Քաղաքականություն
17.03.2024 | 23:01
Հասարակական կարծիքի ուսումնասիրության համառուսական կենտրոնը հրապարակել է իր exit poll-ի
արդյունքները, որոնց համաձայն՝ Վլադիմիր Պուտինը հաղթում է ձայների 87 տոկոսով։ Երկրորդ տեղում Նիկոլայ Խարիտոնովն է (4,6%), երրորդում՝ Վլադիսլավ Դավանկովը (4,2%), չորրորդում՝ Լեոնիդ Սլուցկին (3,0%), գրում է DW-ի ռուսական ծառայությունը։
Կենտրոնական ընտրական հանձնաժողովի տվյալներով՝ քվեաթերթիկների 24,4%-ը մշակելուց հետո Պուտինը հավաքում է ձայների 87,97%-ը։
Հավելենք, որ ԱՄՆ Պետքարտուղարությունը դատապարտել է Ռուսաստանի կողմից օկուպացված ուկրաինական տարածքներում կեղծ ընտրությունների անցկացումը և ընդգծել, որ Միացյալ Նահանգները երբեք չի ճանաչի դրանց արդյունքները։
ԵՄ-ի և ՆԱՏՕ-ի այլ քաղաքական գործիչներ նույնպես թերահավատություն են հայտնել Ռուսաստանի Դաշնությունում նախագահական ընտրությունների վերաբերյալ։ Այսպես, եվրոպական դիվանագիտության ղեկավար Ժոզեպ Բորելի ներկայացուցիչն ասել է, որ ժամանակակից Ռուսաստանում դժվար է պատկերացնել արդար և ժողովրդավարական քվեարկություն։ ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ այս ընտրությունները չեն կարող լինել ազատ և արդար։
«Ռուսաստանում ընտրություններն ազատ և արդար չեն լինելու։ Մենք գիտենք, որ ընդդիմադիր քաղաքական գործիչների մի մասն անազատության մեջ է, մյուսները սպանվել են, շատերը՝ աքսորում»,- ասել է նա:
Հիշեցնենք, որ մարտի 15-ին Ռուսաստանում և Ռուսաստանի Դաշնությանը բռնակցված Ուկրաինայի տարածքներում մեկնարկել են եռօրյա նախագահական ընտրությունները։ Քվեարկության հիմնական օրը մարտի 17-ն էր։
Ընտրություններին մասնակցում են չորս թեկնածուներ․ բացի գործող նախագահ Վլադիմիր Պուտինից՝ իրենց թեկնածություններն են առաջադրել Լեոնիդ Սլուցկին՝ Լիբերալ-դեմոկրատական կուսակցությունից, Նիկոլայ Խարիտոնովը՝ ՌԴ Կոմունիստական կուսակցությունից, Վլադիսլավ Դավանկովը՝ «Նոր մարդիկ» կուսակցությունից։ Կենտրոնական ընտրական հանձնաժողովը որևէ անկախ ընդդիմադրի կամ հակապատերազմական հայացքներ ունեցող թեկնածուի չի գրանցել։
