12.01.2025 | 15:50
Յուրաքանչյուր դատավոր պետք է գործի բացառապես օրենքի և իր խղճի թելադրանքով. ՀՀ նախագահ․ ՏԵՍԱՆՅՈՒԹ
Ուկրաինայում ռուսական ուժերը խոշտանգում, խեղում և բռնաբարում են գերիներին․ ՄԱԿ-ի զեկույցը
Քաղաքականություն
15.03.2024 | 22:26
Հաջորդ շաբաթ ՄԱԿ-ի փորձագետները հերթական զեկույցը կներկայացնեն ռուս զինվորականների կողմից Ուկրաինայում մարդու իրավունքների լայնածավալ խախտումների վերաբերյալ։ BBC-ի Ժնևի թղթակիցը հայտնել է, որ փաստաթուղթում մանրամասն ներկայացվում են ուկրաինացի ռազմագերիների խոշտանգումները, ինչպես նաև երկրի խաղաղ բնակչության (հատկապես՝ Մարիուպոլում) անխնա գնդակոծությունն ու ռմբակոծությունը։
Զեկույցի ապացույցները ստացվել են հարյուրավոր ականատեսների վկայություններից՝ ուկրաինացի ռազմագերիներից և դասալիք ռուս զինվորներից, որոնցից ՄԱԿ-ի քննիչները կարողացել են հարցազրույց վերցնել Ուկրաինա մեկ տասնյակ այցելությունների ժամանակ:
Փաստաթղթի հեղինակները եկել են այն եզրակացության, որ բանտարկյալների սիստեմատիկ խոշտանգումները տարածված են. նրանց պարբերաբար ծեծի են ենթարկում, խոշտանգում էլեկտրաշոկերով, նույնիսկ անդամահատում:
Նախկին բանտարկյալներից մեկը քննիչներին պատմել է, որ ինչ-որ պահի ցավն այնքան անտանելի է դարձել, որ սկսել է խոշտանգողներից մահ աղերսել։
Ռուս դասալիքներն իրենց հերթին հաստատել են, որ բարձրաստիճան սպաները հրաման են տալիս իրենց ենթականերին «աշխատել դաժանորեն և գթասրտություն չդրսևորել»։
Զեկույցը մանրամասն նկարագրում է նաև խաղաղ բնակիչների, հիվանդանոցների և մշակութային վայրերի անխտիր ռմբակոծությունները, ինչպես նաև Ռուսաստանի կողմից օկուպացված քաղաքներում ուկրաինացի խաղաղ բնակիչների խոշտանգումները, բռնաբարությունները և սպանությունները, ինչպես նաև ուկրաինացի երեխաների անօրինական տեղափոխումը Ռուսաստան: Բերված են ապացույցներ պատերազմական այլ հանցագործությունների և մարդկության դեմ հանցագործությունների մասին, որոնց համար մեղավորները պետք է պատասխանատվության ենթարկվեն:
