Հասարակություն
13.03.2024 | 16:27
ArmLur.am-ին արցախցիներն ուշագրավ տեղեկություններ են ներկայացրել Արցախի նախագահ Սամվել Շահրամանյանի վերաբերյալ: Ըստ մեր զրուցակիցների՝ վերջինս անգործություն է ցուցաբերում և բացարձակապես չի զբաղվում արցախցիների խնդիրներով, մինչդեռ լավ էլ ակտիվ ու գործունյա էր, երբ հարցը վերաբերում էր իրեն։ Եվ այսպես, վերջիններիս պնդմամբ, երբ Արցախի նախագահ Սամվել Շահրամանյանը հանդիսանում էր Արցախի ազգային անվտանգության ծառայության ղեկավարը, 2019թ. մարտի 13-ին Արցախի պետական նախարար Գրիգորի Մարտիրոսյանի որոշմամբ Ստեփանակերտ քաղաքի Կնունյանցների փողոցի 1/61 շենքի թիվ 30 բնակարանը նվիրատվության կարգով տրվել էր Հայաստանի Հանրապետությունից Արցախի ազգային անվտանգության ծառայություն տեղափոխված Աշոտ Սերգեյի Առուշանյանին: Դրանից ընդամենը մի քանի ամիս անց Աշոտ Առուշանյանը այդ տունը իբր վաճառել է Էլեոնորա Շահրամանյանին, վերջինս հանդիսանում է Սամվել Շահրամանյանի մայրը: 44-օրյա պատերազմից հետո, 2021թ․ Ս․Շահրամանյանի մայրը այդ բնակարանը վաճառել է Արցախի ներդրումային հիմնադրամին և դրա դիմաց ստացել 25.000.000 դրամ: Մեր զրուցակիցների պնդմամբ՝ ահա սրանով են եղել զբաղված 44-օրյա պատերազմից հետո Արցախում պաշտոն զբաղեցնողները և Արցախը Ադրբեջանին հանձնելուց հետո Հայաստանում որպես «սրբեր» ներկայացողները:
Մեր զրուցակիցների պնդմամբ Արցախում գրեթե բոլորը ճանաչում են ժամանակին բիզնեսով զբաղվող Արամ Խաչատրյանին (Ախթամարի Արամ), ում հարյուրավոր միլիոնների հասնող ունեցվածքը Բակո Սահակյանի կառավարման ժամանակ ամբողջությամբ բռնագրավվել էր պետության կողմից: Երբ Սամվել Շահրամանյանը հանդիսանում էր Արցախում դատական ակտերի հարկադիր կատարման ծառայության ղեկավարը, նրա պաշտոնավարման ժամանակ Արամ Խաչատրյանի կատարողական վարույթի նյութերը անհետացել են, իսկ հետագայում հայտարարեցին, որ դրանք կորել են: Թե ուր են կորել և ում հեղինակությամբ, այդպես էլ մնաց անհայտ ու այդ ամենի համար ոչ ոք պատասխանատվության չկանչվեց:
Արցախցիներից որոշներն էլ դժգոհեցին 2023թ. սեպտեմբերի 25-ին Արցախում բենզինի տարաների պայթյունի պատասխանատուներին առ այսօր պատասխանատվության չկանչելու համար։ Թեև Սամվել Շահրամանյանը հայտարարել էր, որ բենզինի պահեստը գտնվում էր ՊԲ ենթակայության տակ, սակայն բազմաթիվ զինվորականներ պնդում են, որ այն դեպքից օրեր առաջ հանձնվել էր Արցախի կառավարությանը, նման տեղեկություններ ունեն նաև ՀՀ իրավապահ մարմինները։
Մեր զրուցակիցները բավականին բացասական արտահայտվեցին նաև վերջերս Սամվել Շահրամանյանի կողմից Արցախի պետական նախարար նշանակված Արամ Սարգսյանի վերաբերյալ, խոստանալով նրա կերպարի ու կոռուպցիոն արկածների մասին ներկայացնել բազմաթիվ փաստեր:
Ի դեպ, Armlur.am-ի աղբյուրները փոխանցել են, Արցախի Կառավարության 2019թ․ որոշման, այնպես էլ բնակելի տան վաճառքի վերաբերյալ պայմանագրերը, որոնք ամբողջությամբ հաստատում են մեր զրուցակիցների ներկայացրած տեղեկությունները։ Հատկանշական է, որ հիշյալ տեղեկությունները ամբողջությամբ գտնվում են ՀՀ համապատասխան պետական մարմինների տիրապետության տակ և հարկ եղած դեպքում կարող են ստուգվել նրանց կողմից։
