Ֆիզկուլտինստիտուտի պրոռեկտորը դատի է տվել ռեկտորին․ բուհում կրքերը չեն հանդարտվում․ ՏԵՍԱՆՅՈՒԹ

Հայաստանի ֆիզիկական կուլտուրայի և սպորտի պետական ինստիտուտում կրքերը տևական ժամանակ է՝ չեն հանդարտվում: Ուսումնագիտական գծով պրոռեկտոր Լուսինե Ստեփանյանը դիմել է դատարան՝ ռեկտորի ժամանակավոր պաշտոնակատար Տիգրան Սիմոնյանի հրամաններն անվավեր ճանաչելու պահանջով: Բուհի անձնակազմը բաժանվել է երկու մասի. մի մասը ցանկանում է, որ ռեկտորի պաշտոնում շարունակի մնալ Սիմոնյանը, իսկ մյուս մասը պաշտպանում է նախկին ռեկտոր Դավիթ Խիթարյանին:

ՀՀ դատախազությունը նախորդ տարվա մայիսին ինստիտուտի նախկին ռեկտոր Դավիթ Խիթարյանի նկատմամբ քրեական հետապնդում էր հարուցել՝ պաշտոնեական կեղծիքի մեղադրանքով։ Խիթարյանը, սակայն, չի ընդունում իրեն ներկայացված մեղադրանքը: Սիմոնյանի խոսքով՝ պրոռեկտոր Ստեփանյանն էլ Խիթարյանի համախոհն է:

«Մարդիկ ինչ-ինչ պատճառներով չեն ուզում զրկվել իրենց պաշտոններից: Բազմիցս խախտումներ են արել վերջին տարիների ընթացքում: Նրանք բուհին նայում են որպես բիզնես-պրոյեկտի, և ընդամենն ուզում են փող վաստակել: Արդյունքում տուժում են ուսանողներն ու դասախոսները»,- ասում է Սիմոնյանը:

Լուսինե Ստեփանյանը, սակայն, պնդում է, որ բուհում գիտխորհրդի որոշումները կայացվում են ընթացակարգերի խախտումներով։ Երկու նկատողություն ունի ռեկտորից, որոնք անհիմն է որակում:

Սիմոնյանի խոսքով՝ Ստեփանյանը, օրինակ, խախտել է պաշտոնական թղթաշրջանառության ընդունված կարգը և առանց ռեկտորի հաստատման՝ միանձնյա որոշումներ է ընդունել՝ ինստիտուտի մի խումբ ուսանողների համար վերաքննություն կազակերպելով: Ստեփանյանը, սակայն, այլ բացատրություն ունի. ասում է՝ բուհում արդեն 3 տարի է՝ պրոռեկտորն է համակարգում նշյալ հարցը:

Նկատողություններից մեկն էլ, ըստ Ստեփանյանի, իրեն տրվել է կրթական ծրագրերից մեկով նեղ մասնագետ հրավիրելու հարցի առնչությամբ: Պրոռեկտորի պնդմամբ՝ որոշումը հաստատվել է հուլիսին ոչ միանձնյա կերպով, մինչդեռ խիստ նկատողություն տրվել է միայն իրեն:

Մանրամասները՝ տեսանյութում:

Աննա Բաբաջանյան