Քաղաքականություն
12.03.2024 | 10:55
ԱՄՆ-ն առաջարկում է 2025 ֆինանսական տարում Հայաստանին տրամադրել 52 մլն դոլարի օգնություն։ Այս մասին հերթական ճեպազրույցում հայտարարել է ԱՄՆ Պետքարտուղարության մամուլի ծառայության ղեկավար Մեթյու Միլլերը։
2025 ֆինանսական տարվա բյուջեով առաջարկվում է «աջակցել Ուկրաինային և ապահովել Ռուսաստանի ռազմավարական ձախողումը»։ ՀՀ-ին ֆինանսական օգնություն հատկացնելու մասում նշվում է, որ ֆինանսական աջակցություն կտրամադրվի Երևանին՝ բարձրացնելու Հայաստանի տնտեսական և ժողովրդավարական կայունությունը և կապերը Արևմուտքի հետ։
«2025 ֆինանսական տարվա հայտն արտացոլում է Միացյալ Նահանգների կայուն աջակցությունը անկայուն միջավայրի երկրներին, ինչպիսիք են Մոլդովան և Վրաստանը, և կնպաստի Բելառուսի ժողովրդավարական ապագային ուղղված ջանքերին, Հայաստանի տնտեսական և ժողովրդավարական ճկունութանը և կապերն Արևմուտքի հետ կառուցելուն, կաջակցի Արևմտյան Բալկանների երկրների անցմանը ԵՄ անդամակցությանը»,- ասված է Պետքարտուղարության տարածած հայտարարության մեջ։
Դրանում նաև ասվում է, որ արտաքին ռազմական ֆինանսավորման համար պահանջվող 204,2 միլիոն դոլարը ներառում է 150 միլիոն դոլար՝ Եվրոպական և Եվրասիական տարածաշրջանային գործող ստորաբաժանման համար, 9,75 միլիոն դոլար՝ Բալթյան երկրներից յուրաքանչյուրի (Էստոնիա, Լատվիա և Լիտվա) և 25,0 միլիոն դոլար՝ Վրաստանի համար: Այս ծրագրերը կշարունակեն զարգացնել դաշնակիցների և գործընկերների կարողությունները տարածաշրջանում Պուտինի ագրեսիվ պատերազմից պաշտպանվելու համար և կօգնեն դաշնակիցներին լրացնել Ուկրաինային նվիրաբերված նյութերն ու հնարավորությունները:
