Դատարանը մերժեց Լևոն Քոչարյանի նկատմամբ կիրառված բացակայելու արգելքը վերացնելու միջնորդությունը

Ազգային ժողովի պատգամավոր, Հայաստանի երկրորդ նախագահ Ռոբերտ Քոչարյանի որդու՝ Լևոն Քոչարյանի գործով դատական նիստի ընթացքում այսօր նրա պաշտպաններից Արամ Վարդևանյանը միջնորդեց Լևոն Քոչարյանի նկատմամբ ընտրված խափանման միջոց բացակայելու արգելք խափանման միջոցը ժամանակավորապես վերացնել: Պաշտպանի խոսքով` Քոչարյանը, որպես Ազգային ժողովի պատգամավոր, մարտի 23-ից 28-ը գործուղում ունի:

Պաշտպան Էրիկ Ալեքսանյանն էլ ասաց, որ Քոչարյանի նկատմամբ ընտրված խափանման միջոց բացակայելու արգելքը խոչընդոտ է այլ տեղանք մեկնելու համար, իսկ պետությունը չպետք է որևէ խոչընդոտ ստեղծի ժողովրդի անունից հանդես եկող պատգամավորի պարտականությունների կատարմանը:

Մեղադրող Հայկ Հարությունյանն առարկեց միջնորդության դեմ, նշեց, որ Ազգային ժողովի նախագահի կողմից արձակված կարգադրությունը` Լևոն Քոչարյանի գործուղման վերաբերյալ, գուցե, նոր փաստ է, բայց դա նոր փաստարկ չէ մեղադրյալի նկատմամբ մեկ շաբաթ առաջ ընտրված խափանման միջոցի հարցը կրկին քննարկման առարկա դարձնելու համար:

Մեղադրողը նաև նշեց, որ չի վերացել նաև Քոչարյանի նկատմամբ «բացակայելու արգելք» խափանման միջոց կիրառելու իրավաչափության պայմանը, այն է` նրա փախուստը կանխելու նպատակը:

Դատարանը նշեց, որ քրեական դատավարության օրենսգրքով նախատեսված «բացակայելու արգելք» խափանման միջոցը ժամանակավորապես վերացնելու և կրկին կիրառելու կարգ չի սահմանում, դատարանը նախորդ դատական նիստի ընթացքում Քոչարյանի նկատմամբ խափանման միջոց ընտրելիս նաև այն հանգամանքն էր հաշվի առել, որ կարող է նրա մեկնելու կարիք լինել, սակայն գտնում է, որ իրավաչափության պայմաններ առկա չեն Քոչարյանի խափանման միջոցը վերցնելու համար:

Հաջորդ նիստը նշանակվեց մարտի 12-ին, որի շրջանակներում պաշտպանները ստիպված են Քոչարյանի նկատմամբ գրավը որպես խափանման միջոց կիրառելու միջնորդություն ներկայացնել, որպեսզի գոնե այս միջոցով հնարավոր լինի ապահովել Քոչարյանի գործուղման մեկնելը:

Արաքս Մամուլյան