Աննախադեպ լարում՝ ՀՀ- ՌԴ հարաբերությունում․ ինչ սպասել ՀԱՊԿ-ը լքելուց, ՌԴ-ին Զվարթնոցից հանելուց հետո․ ՏԵՍԱՆՅՈՒԹ

Հայաստանը պաշտոնական նամակով դիմել է Ռուսաստանին և տեղեկացրել, որ «Զվարթնոց» օդանավակայանում ծառայություն պետք է իրականացնեն միայն հայ սահմանապահները։ ԱԽ քարտուղարն ասում է՝ սա Երևանի հստակ դիրքորոշումն է, Հայաստանն ունի կարողություններ՝ օդանավակայանում ամբողջական վերահսկողության համար։

Այս գործընթացը, իհարկե, արագացավ «Զվարթնոց»-ում ռուս սահմանապահների կողմից Դմիտրի Սեդրակովին ձերբակալելուց, Գյումրիի ռուսական բազա տանելուց և ՌԴ տեղափոխելուց հետո։ Եվ այս ամենը՝ առանց ՀՀ-ի իրավապահներին տեղյակ պահելու։

Եվս մեկ թեժ քննարկում կա այսօր հայ-ռուսական հարաբերություններում։ ՀՀ իշխանությունները վարչապետի մակարդակով ասում են, որ եթե Ադրբեջանի ռազմական ագրեսիային գնահատական չտրվի, ՀԱՊԿ-ին մասնակցությունը նաև դե յուրե կսառեցվի, հավանաբար, նկատի ունենալով անդամակցության դադարեցումը։

Ըստ Լավրովի՝ Մոսկվան ցանկանում է պատասխան ստանալ Երևանից պարտավորությունների կատարման և համատեղ ինտեգրված կառույցների, այդ թվում՝ ՀԱՊԿ-ի ծրագրերին մասնակցելու վերաբերյալ:

ՀՀ ԱԽ քարտուղարը պատասխանում է․ «Ես կասեի, որ Ռուսաստանը՝ որպես ՀԱՊԿ անդամ, պետք է հստակեցնի իր դիրքորոշումը Հայաստանի հանդեպ, այլ ոչ թե Հայաստանը պետք է դա անի»։

Ի՞նչ է կատարվում հայ-ռուսական հարաբերություններում, պե՞տք է ՀԱՊԿ-ից դուրս գալ, ռուսներին հանել «Զվարթնոց» օդանավակայանից և, ընդհանրապես, ի՞նչ փոփոխություններ պետք է լինեն հայ-ռուսական հարաբերություններում։

Factor TV-ի հրավիրած բանավեճին մասնակցում են ՀՀ արտակարգ դեսպանորդ և լիազոր նախարար Էդգար Ղազարյանը, Միջազգային և անվտանգության հարցերի հայկական ինստիտուտի ասոցացված փորձագետ Դավիթ Ստեփանյանը, Արցախի ԱԺ պատգամավոր, պատմաբան Արամայիս Աղաբեկյանը, սոցիոլոգ Կարեն Սարգսյանը, միջազգայնագետ Դավիթ Կարապետյանը։

Մանրամասները՝ տեսանյութում։