Քաղաքականություն
07.03.2024 | 22:47
2023 թվականին աշխարհում միգրացիոն երթուղիներում ամենաշատ մարդիկ են զոհվել 2014 թվականից սկսած՝ տվյալների հավաքագրման արդյունքներով: ՄԱԿ-ի Միգրացիայի միջազգային կազմակերպության (ՄՄԿ) անհետ կորած միգրանտների նախագիծը գրանցել է, ընդհանուր առմամբ, 8,565 զոհ, ինչը 20 տոկոսով ավելի է նախորդ տարվա համեմատ: Նախորդ ամենաբարձր ցուցանիշը գրանցվել է 2016 թվականին (8,084 մահ)։
Սրա հետ մեկտեղ, մահացած միգրանտների մոտ կեսը խեղդվել է, ինը տոկոսը մահացել է ավտովթարների և յոթ տոկոսը՝ բռնության հետևանքով։ Միջերկրական ծովը միգրացիոն ամենավտանգավոր ճանապարհն է։
Ընդհանուր առմամբ, 10 տարի առաջ «Անհետ կորած միգրանտների» ծրագրի մեկնարկից հետո ավելի քան 63,700 մարդ է մահացել, որոնց գրեթե կեսը՝ Միջերկրական ծովում: Ըստ այդ տվյալների՝ Միջերկրական ծովը շարունակում է մնալ ամենավտանգավոր միգրացիոն ուղին, որտեղ անցյալ տարի զոհվել է առնվազն 3129 մարդ, իսկ 2024-ի երկու ամսվա ընթացքում՝ 254 միգրանտ:
Կազմակերպությունը շեշտում է, որ իրական թվերը կարող են զգալիորեն ավելի բարձր լինել, քանի որ վիճակագրության մեջ ներառված են միայն հաստատված մահերը: Եթե, օրինակ, միգրանտների անօրինական փոխադրմամբ զբաղվող նավը գիշերը լքում է ափը և հետագայում ոչ մի տեղ չի հայտնվում, ապա մարդկանց մահը մնում է առանց փաստաթղթավորման։
Նույնքան դժվար է մահվան դեպքեր հայտնաբերել Կոլումբիայի և Պանամայի միջև վտանգավոր ջունգլիների միջանցքում, որով անցնում են հարավամերիկացի շատ միգրանտներ:
«Անհետ կորած միգրանտների» նախագիծը մեկնարկել է 2014 թվականին այն բանից հետո, երբ Միջերկրական ծովում գտնվող իտալական Լամպեդուզա կղզու ափերի մոտ երկու նավերի խորտակման հետևանքով բազմաթիվ զոհեր են գրանցվել:
