Քաղաքականություն
06.03.2024 | 23:30
Թուրքիայի բնակչության ճնշող մեծամասնությունը կարծում է, որ երկիրը սխալ ուղղությամբ է գնում։ Այս մասին են վկայում Ipsos-ի հրապարակած գլոբալ մարտահրավերների վերաբերյալ նոր հարցման տվյալները, գրում է Turkish Minute-ը։
Ipsos-ի՝ «Ինչն է անհանգստացնում աշխարհին» հարցումներից վերջինը, որն անցկացվել է 29 երկրներում ավելի քան 20,000 չափահասների խմբի միջև հունվարի 26-ից փետրվարի 9-ն ընկած ժամանակահատվածում, պարզել է, որ թուրքերի 73 տոկոսը կարծում է, որ երկրում ամեն ինչ «սխալ ուղու վրա է», 74 տոկոսն էլ երկրի ներկայիս տնտեսական իրավիճակը բնութագրում է որպես «վատ»:
Հետազոտության համաձայն՝ գնաճը թիվ մեկ մտահոգությունն է արդեն 23-րդ ամիսն անընդմեջ՝ միջինը 34 տոկոս։ Թուրքիան հինգերորդն է այն երկրների շարքում, որոնք գնաճը համարում են իրենց հիմնական խնդիրը (50 տոկոս)՝ Արգենտինայից (69 տոկոս), Սինգապուրից (55 տոկոս), Կանադայից (55 տոկոս) և Ավստրալիայից (51 տոկոս) հետո:
Թուրքերը մտահոգված են նաև աղքատությամբ և սոցիալական անհավասարությամբ (30 տոկոս), հանցագործությամբ և բռնությամբ (22 տոկոս), գործազրկությամբ (22 տոկոս), ֆինանսական/քաղաքական կոռուպցիայով (21 տոկոս) և ահաբեկչությամբ (20 տոկոս): Թուրքերի միայն 5 տոկոսն է դիտում կլիմայի փոփոխությունը որպես մտահոգություն։
Թուրքիայում տարեկան գնաճը փետրվարին կրկին ավելացել է՝ հասնելով 67,1 տոկոսի։
Էմմա Չոբանյան
