Քաղաքականություն
06.03.2024 | 23:14
Գերմանական Բրանդենբուրգում էլեկտրական սյան ենթադրյալ հրկիզումից հետո, որի արդյունքում հոսանքազրկվել էին տասնյակ հազարավոր տեղի բաժանորդներ, ինչպես նաև Բեռլինի մերձակայքում գտնվող Գրյունհեյդեում Tesla-ի «գիգաֆաբրիկան», ամերիկյան ավտոարտադրողը կանխատեսում է, որ գործարանում արտադրությունը կդադարեցվի մի քանի օրով, գրում է DW-ի ռուսական ծառայությունը։
Ընկերության ներկայացուցիչների խոսքով՝ մարտի 5-ին էլեկտրաէներգիայի անջատումը հանգեցրել է հսկայական հետևանքների։
«Մենք չենք ակնկալում, որ այս շաբաթ կկարողանանք վերսկսել արտադրությունը»,- ասել է գործարանի ղեկավար Անդրե Թիերիգը:
Ընկերության 12,000 աշխատակիցներից գրեթե բոլորին տուն են ուղարկել, իսկ Թիերիգը վնասը գնահատել է հարյուր միլիոնավոր եվրո:
Ոստիկանությունը հետաքննում է՝ արդյո՞ք ճանաչված ձախ ծայրահեղական Vulcan Group-ը, որը ստանձնել է միջադեպի պատասխանատվությունը, մեղավոր է հրկիզման համար։
«Այսօր մենք դիվերսիա արեցինք Tesla-ի դեմ»,- մեջբերում են գերմանական լրատվական գործակալությունները խմբի հայտարարությունը, որը տարածվել է էլեկտրոնային փոստով:
Խումբը Tesla-ին մեղադրում է «շահագործման էքստրեմալ պայմանների» մեջ և պահանջում «գիգաֆաբրիկայի ամբողջական ոչնչացում»։
