22.07.2026 | 23:29
СHP-ի նկատմամբ ճնշումների ֆոնին՝ Թուրքիայի ընդդիմության առաջնորդը հայտնել է նոր կուսակցություն ստեղծելու մասին
Ադրբեջանի ԱԳՆ-ն դատապարտել է Եվրախորհրդարանի զեկույցը
Քաղաքականություն
29.02.2024 | 18:06
Ադրբեջանի ԱԳՆ մամուլի քարտուղար Այխան Հաջիզադեն մեկնաբանել է Եվրախորհրդարանի միջազգային հարաբերությունների հանձնաժողովի կողմից պատրաստված «Միասնական արտաքին և անվտանգության քաղաքականության իրականացման տարեկան» զեկույցը՝ խստորեն դատապարտելով այն, գրում են ադրբեջանական լրատվամիջոցները։
«Մենք խստորեն դատապարտում և մերժում ենք «Միասնական արտաքին և անվտանգության քաղաքականության իրականացման տարեկան զեկույցը», որը պարունակում է դրույթներ՝ ուղղված մեր երկրի դեմ։ Այդ դրույթները, որոնք հանդիսանում են Ադրբեջանի դեմ զրպարտչական արշավի մաս, որտեղ բոլոր փաստերը խեղաթյուրված են, զրպարտիչ և բացարձակապես անհիմն, լուրջ հարցեր են առաջացնում Եվրամիության ընդհանուր արտաքին և անվտանգության քաղաքականության ապագայի վերաբերյալ։ Ցավոք, այս զեկույցը, որն արտացոլում է արտաքին և անվտանգության քաղաքականության մակերեսային մոտեցումը, ցույց է տալիս նաև, որ Եվրախորհրդարանի անդամները պոպուլիստական քաղաքականության պատանդ են և հեռու են մեր տարածաշրջանի նկատմամբ ճիշտ ռազմավարական մոտեցման մշակումից»,- ասել է Հաջիզադեն։
Նա նշել է, որ Եվրախորհրդարանն իր զեկույցով, իբր, անհարգալից վերաբերմունք է ցուցաբերում Ադրբեջանի տարածքային ամբողջականության և ինքնիշխանության նկատմամբ, որը դրևորվում է Արցախի դեմ իրականացրած էթնիկ զտման դատապարտմամբ և «անջատաղոկանության խրախուսմամբ»։
Հավելենք, որ փետրվարի 28-ին Եվրախորհրդարանը երկու զեկույց է ընդունել արտաքին քաղաքականության ու ԵՄ անվտանգության և պաշտպանական քաղաքականության վերաբերյալ։
Մասնավորապես, Եվրախորհրդարանը ԵՄ-ին կոչ է անում անհապաղ պատժամիջոցներ կիրառել Ադրբեջանի դեմ և կասեցնել ռազմավարական էներգետիկ գործընկերության մասին փոխըմբռնման հուշագիրը, պատրաստ լինել թիրախավորված և անհատական պատժամիջոցներ սահմանելու Ադրբեջանի քաղաքական և ռազմական ղեկավարության դեմ, կասեցնել նավթի և գազի ներմուծումը Ադրբեջանի կողմից Հայաստանի դեմ ցանկացած ռազմական ագրեսիայի դեպքում, ամրապնդել Հայաստանում ԵՄ առաքելության մանդատը, ավելացնել դրա չափը, երկարացնել դրա ժամկետը և դիտորդներ տեղակայել Թուրքիայի հետ սահմանին, կասեցնել Ադրբեջանի հետ նոր գործընկերության համաձայնագրի շուրջ բանակցությունները։
