Թուրքիան փոքրամասնությունների, այդ թվում՝ հայկական մամուլի համար, 300,000 լիրա է հատկացրել

Թուրքիայի մամուլի գործակալությունը, որը վերջին անգամ տեղի հայկական, հունական և հրեական մամուլին աջակցություն էր տրամադրել 2022 թվականին, այս տարի փոքրամասնությունների թերթերին հատկացրել է 300 հազար լիրա, գրում են թուրքական լրատվամիջոցները։

Հաղորդվում է, որ փետրվարի 21-23-ը գործակալությունը համագումար է հրավիրել, որի արդյունքներով հայտարարել է, որ օգնություն կտրամադրվի մամուլի ասոցիացիաներին և փոքրամասնությունների թերթերին։ Ըստ այդմ, 700 հազար լիրա հատկացվել է մամուլի ասոցիացիաներին, իսկ 300 հազար լիրա՝ փոքրամասնության կարգավիճակ ունեցող կրոնական համայնքների հրատարակած թերթերին։

Սակայն հայկական, հունական և հրեական մամուլին տրվելիք աջակցությունը նույնն է, ինչ 2022 թվականին՝ չնայած երկրում 159,95 տոկոս գնաճին։ Օգնությունը կիսում են այնպիսի թերթեր, ինչպիսիք են Apoyematini-ն, Agos-ը, Şalom-ը, Ժամանակը, Նոր Մարմարան և İHO-ն։

Հավելենք, որ 2012 թվականից Մամուլի գործակալությունն աջակցում է օրաթերթերին և շաբաթաթերթերին, որոնք լույս են տեսնում առնվազն 10 տարի և «հրատարակվում են Լոզանի պայմանագրի շրջանակում փոքրամասնության կարգավիճակ ունեցող համայնքների կողմից», եթե գրավոր դիմում են ներկայացնում։

BİK-ը 2021 թվականին փոքրամասնությունների թերթերին, ընդհանուր առմամբ, հատկացրել է 350 հազար լիրա, իսկ 2022 թվականին՝ 300 հազար թուրքական լիրա։

Էմմա Չոբանյան