Ալեքսեյ Նավալնիի մորը ցույց են տվել նրա մարմինը

Ալեքսեյ Նավալնիի մայրը տեսաուղերձ է ձայնագրել`  հայտնելով, որ տեսել է որդու մարմինը:

«Քիչ առաջ դուրս եկա Սալեխարդ քաղաքի քննչական կոմիտեի շենքից ։ Գրեթե մեկ օր ես այնտեղ մենակ եմ անցկացրել ՝ քննիչների և քրեագետների հետ։ Փաստաբանին թույլ են տվել միայն այսօր՝ ճաշից հետո։ Երեկ երեկոյան նրանք ինձ գաղտնի տարան դիահերձարան, որտեղ ցույց տվեցին Ալեքսեյի դին։ Քննիչները պնդում են, որ իրենց հայտնի է մահվան պատճառը, իրենց մոտ պատրաստ են բոլոր այն բժշկական և իրավական փաստաթղթերը, որոնք ես տեսել եմ, իսկ մահվան մասին բժշկական վկայականը ստորագրել եմ: Ըստ օրենքի ՝ նրանք պետք է անմիջապես ինձ տային Ալեքսեյի մարմինը, բայց մինչ օրս դա չեն արել»,—  BBC-ի ռուսական ծառայության փոխանցմամբ՝ ասել է Նավալնիի մայրը։

Նրա խոսքով՝ իրեն «շանտաժի են ենթարկում և պայմաններ դնում, թե որտեղ և ինչպես պետք է թաղվի Ալեքսեյը»։

«Հրամաններ են գալիս՝ Կրեմլից, թե Քննչական կոմիտեի կենտրոնական ապարատից։ Նրանք ուզում են, որ դա արվի գաղտնի, առանց հրաժեշտի: Նրանք ուզում են ինձ բերել գերեզմանատան ծայրամաս, թարմ գերեզմանի մոտ և ասել՝ ահա այստեղ է Ձեր որդին։  Ես դրան համաձայն չեմ»,- հայտարարել է նա։

Նավալնիի մոր խոսքով ՝ ինքը տեսագրել է այդ տեսանյութը, քանի որ «նրանք սկսել են իրեն սպառնալ»։ Նրան ասել են, որ եթե նա չհամաձայնի Նավալնիի գաղտնի հուղարկավորությանը, «նրանք ինչ-որ բան կանեն նրա մարմնի հետ»:

«Քննիչ Վարապաևը բացեիբաց ինձ ասաց ՝ ժամանակը հօգուտ Ձեզ չի աշխատում, դիակը քայքայվում է»,- ասել է Նավալնիի մայրը։