Բավարար տվյալներ չկան, որ Սոնա Մնացականյանի համար տեսանելի է եղել կարգադրիչի` հատումն արգելելու ցուցումը

Վարչապետի ավտոշարասյան մասնակցությամբ վթարի գործով քննության առարկա են դարձել նաև վթարի հետևանքով մահացած հղի կնոջ` Սոնա Մնացականյանի գործողությունները, և որոշում է կայացվել նրա նկատմամբ քրեական հետապնդում չիրականացնելու վերաբերյալ: Այս մասին այսօր գործով դատական նիստի ընթացքում ասաց դատախազ Աշոտ Կոստանյանը:

Ըստ քրեական գործում առկա տվյալների` բավարար տվյալներ ձեռք չեն բերվել, որ հետիոտնի, այսինքն` Սոնա Մնացականյանի համար տեսանելի է եղել կանաչ լույսի առկայության պայմաններում կարգադրիչի` հատումը արգելելու ցուցումը:

Նշենք, որ նախկին քրեական օրենսգրքի 247-րդ հոդվածով քրեական պատասխանատվություն է նախատեսվում ուղևորի, հետիոտնի կամ երթևեկության այլ մասնակցի կողմից (բացի սույն օրենսգրքի տրանսպորտի երթևեկության անվտանգության և շահագործման կանոնները խախտելու համար:

Հիշեցնենք, որ 2022 թվականի ապրիլի 26-ին Երևանի Լեո-Պարոնյան փողոցների խաչմերուկում վրաերթ է տեղի ունեցել, որի հետևանքով մահացել է 28-ամյա հղի կին՝ Սոնա Մնացականյանը։ Կնոջը վրաերթի ենթարկած ավտոմեքենան վարչապետ Նիկոլ Փաշինյանին ուղեկցող Ճանապարհային ոստիկանության ուղեկցող ծառայության սպայական վաշտից է եղել, իսկ ղեկին եկել է հրամանատար Արամ Նավասարդյանը։

Վերջինս մեղադրվում է նախկին քրեական օրենսգրքի երկու հոդվածներով՝ 242-րդ հոդվածի 2-րդ մասով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) և 244-րդ հոդվածի 1-ին մասով՝ (ճանապարհատրանսպորտային պատահարի վայրը թողնելը)։

Նախորդ դատական նիստի ընթացքում Արամ Նավասարդյանի պաշտպանները միջնորդել են նշանակել կրկնակի դատատեխնիկական ու տեսաձայնագրային փորձաքննություն, ինչպես նաև քննչական փորձարարություն իրականացնել, սակայն մեղադրողներն ու տուժող կողմն առաջկեցին այս միջնորդության դեմ:

Դատավոր Կարեն Ֆարխոյանը որոշեց մերժել միջնորդությունը:

Արաքս Մամուլյան