Քաղաքականություն
21.02.2024 | 22:25
Ռուսաստանը դիտարկում է ԽՍՀՄ-ԱՄՆ «Շևարդնաձե-Բեյքեր համաձայնագրից» հրաժարվելու հնարավորությունը, որի համաձայն բաժանվել է Բերինգի նեղուցի ծովային տարածքը, գրում է The Moscow Times-ը։
1990 թվականին ստորագրված համաձայնագիրը, ըստ որի՝ ԱՄՆ-ը ստացել է ԽՍՀՄ բացառիկ տնտեսական գոտու մոտ 30 հազար քառակուսի կիլոմետրը և ավելի քան 40 հազար քառակուսի կիլոմետր շելֆը, մոտ ապագայում կարող է չեղարկվել։ Այս մասին չորեքշաբթի Պետդումայի լիագումար նիստում հայտարարել է Միջազգային հարցերով հանձնաժողովի անդամ Ռոզա Չեմերիսը։
«Հաջորդը (չեղարկման ենթակա) կլինի Բերինգի նեղուցում համագործակցության մասին համաձայնագիրը, որը կնքվել է 1990 թվականին Շևարդնաձեի և ԱՄՆ պետքարտուղար Ջեյմս Բեյքերի միջև»,- ասել է Չեմերիսը:
Ռուս պաշտոնյաները սկսել են քննարկել պայմանագրի հնարավոր չեղարկման հարցը, որը կիրառվում է ժամանակավոր հիմունքներով, քանի որ այն երբեք չի վավերացվել Ռուսաստանի խորհրդարանի կողմից։
Համաձայնագիրը դադարեցնելու և ԱՄՆ-ի կողմից վերահսկվող տնտեսական գոտու մասը դե-ֆակտո ռուսական հայտարարելու գաղափարն անցյալ տարվա հոկտեմբերին արտահայտել էր Կամչատկայի երկրամասի սենատոր Բորիս Նևզորովը։ Նրա խոսքով՝ Շևարդնաձե-Բեյքեր համաձայնագիրը խտրական էր և անարդարացիորեն Ռուսաստանին զրկել է Բերինգի ծովի 78 հազար քառակուսի կիլոմետր տարածքից, ներառյալ մայրցամաքային շելֆը։
