18.03.2026 | 14:22
Հայ ֆուտբոլիստը Բելառուսի հավաքականի հայտացուցակում է ընդգրկվել Հայաստանի դեմ խաղի համար
Ադրբեջանի քաղաքացիների 78%-ը կողմ է Հայաստանի հետ խաղաղության պայմանագրի ստորագրմանը․ հարցում
Քաղաքականություն
21.02.2024 | 21:35
Ադրբեջանի քաղաքացիների 78,2 տոկոսը կողմ է Հայաստանի հետ խաղաղության պայմանագրի կնքմանը։ Այսպիսին են սոցիոլոգիական հարցման արդյունքները, որն անցկացրել է Ադրբեջանի սոցիալական հետազոտությունների կենտրոնը այս տարվա փետրվարին, գրում են տեղական լրատվամիջոցները։
Միևնույն ժամանակ, հարցման մասնակիցների 19,5 տոկոսը չի աջակցում Բաքվի ու Երևանի միջև խաղաղության գործընթացին, հարցվածների ևս 2,3 տոկոսը դժվարացել է պատասխանել հարցին։
Նշվում է, որ հարցումն անցկացվել է փետրվարին Ադրբեջանի 12 տնտեսական շրջաններում՝ հեռախոսային հարցազրույցների միջոցով, որին մասնակցել է 18 տարեկանից բարձր 390 քաղաքացի։ 2023 թվականի նոյեմբերին խաղաղության համաձայնագրի կնքմանը կողմ էր եղել հարցվածների 78,5 տոկոսը։
Հավելենք, որ նման հարցումները պաշտոնական Բաքվի քարոզչության բաղադրիչներից են։
«Չնայած միջազգային հանրային կարծիքում Ադրբեջանին որպես ագրեսոր ներկայացնելու՝ Հայաստանի փորձերին՝ հարցումները ցույց են տալիս, որ ադրբեջանական հասարակության վերաբերմունքը խաղաղության համաձայնագրի նկատմամբ պարբերաբար աճող դրական դինամիկա է ցույց տալիս»,- գրում են ադրբեջանական լրատվամիջոցները։
Հարցումն անցկացրած Ադրբեջանի սոցիալական հետազոտությունների կենտրոնը գործում է իշխանությունների ենթակայությամբ։ Այն ստեղծվել է Ադրբեջանի նախագահ Իլհամ Ալիևի հրամանով 2019 թվականի փետրվարի 8-ին։
Էմմա Չոբանյան
