12.08.2026 | 10:13
Մեր աշակերտները արհեստական բանականության միջազգային օլիմպիադայում թիմային պայքարում 5-րդ տեղն է զբաղեցրել. ԿԳՄՍ նախարար
ԱՄՆ Կոնգրեսի հանրապետականները մարտին կառավարության շաթդաուն են կանխատեսում
Քաղաքականություն
21.02.2024 | 16:07
ԱՄՆ Կոնգրեսի Ներկայացուցիչների պալատի հանրապետականները չեն բացառում, որ 2024 ֆինանսական տարվա բյուջեի ընդունման շուրջ տարաձայնությունները կարող են հանգեցնել կառավարության շաթդաունի (աշխատանքի դադարեցման)։ Այս մասին գրում է Axios-ը՝ հղում անելով իր աղբյուրներին։
«Մարդիկ կանխատեսում են շաթդաուն, եթե նույնիսկ դա լինի ընդամենը մի քանի օրով»,- Axios-ին ասել է հանրապետական կուսակցության պատգամավորներից մեկը:
Ըստ պարբերականի զրուցակցի՝ Ներկայացուցիչների պալատի ենթահանձնաժողովի նախագահներից մեկն իր հանրապետական գործընկերոջ հետ զրույցում ստեղծված իրավիճակը բնութագրել է՝ «կա՛մ մոտ են գործարքի կնքմանը, կա՛մ այն ուր որ է՝ կձախողվի»:
Կառավարության մասնակի շաթդաունը կսկսվի մարտի 1-ին, ամբողջականը՝ մարտի 8-ին, եթե բյուջեն կամ ժամանակավոր ծախսերը մինչ այդ չընդունվեն։
Ներկայացուցիչների պալատի խոսնակ Մայք Ջոնսոնն անցյալ շաբաթ հայտարարել էր. «Մենք կարծում ենք, որ կտեղավորվենք ժամկետների մեջ»:
Այնուամենայնիվ, ըստ Axios-ի, Ջոնսոնը բարդ ընտրության առաջ է կանգնած։ Շաթդաունից խուսափելու պարզ, բայց ռիսկային տարբերակ կլինի դեմոկրատների օգտագործումը՝ համաձայնագիրը երկու երրորդ մեծամասնությամբ ընդունելու համար: Այնուամենայնիվ, հենց դեմոկրատների հետ համագործակցության համար էր, որ նախկին խոսնակ Քևին Մաքքարթին կորցրեց իր պաշտոնը, ասվում է հրապարակման մեջ։
Հունվարին ԱՄՆ նախագահ Ջո Բայդենը շաթդաունից խուսափելու համար ստորագրեց օրենք, որով կառավարության ժամանակավոր ֆինանսավորումը երկարաձգեց մինչև մարտ: Փաստաթուղթը նախատեսում է կառավարության մի շարք հաստատությունների ֆինանսավորման երկարաձգում մինչև 2024 թվականի մարտի 1-ը, իսկ մյուս հաստատություններինը՝ մինչև մարտի 8-ը։
